İqlim dəyişikliklərinin nəticələri mənzil təhlükəsizliyi problemini və əhalinin məcburi köçünü daha da gücləndirir, xüsusilə də sosial, iqtisadi və ekoloji qeyri-sabitliklə üzləşən icmalara ciddi təsir göstərir.
Elchi.az xəbər verir ki, bu barədə Ümumdünya Şəhərsalma Forumunun 13-cü sessiyasının (WUF13) yekunları üzrə qəbul edilmiş “Bakı Fəaliyyətə Çağırış”da bildirilir.
Sənəddə qeyd olunub ki, təkrarlanan daşqınlar, quraqlıqlar, biomüxtəlifliyin itirilməsi, ətraf mühitin çirklənməsi, həddindən artıq istilər və havanın keyfiyyətinin pisləşməsi əhalinin sağlamlığına, ekosistemlərə, yaşayış vasitələri mənbələrinə və ümumi həyat keyfiyyətinə dağıdıcı təsir göstərir.
Çağırışın müəllifləri vurğulayıblar ki, iqlim dəyişiklikləri ərazilərin yaşayış üçün yararlılığına mənfi təsir göstərir və şəhərlərdə, eləcə də regionlarda mənzil sistemlərinə təzyiqi artırır.
Bununla əlaqədar olaraq, sənəd iqlim dayanıqlılığını gücləndirə, biomüxtəlifliyi qoruya və ətraf mühitə mənfi təsiri azalda bilən mənzil sistemlərinin yaradılmasına çağırır.
Çağırışın mətninə görə, buna iqlim ədaləti prinsiplərinə əsaslanan və ekoloji cəhətdən məsuliyyətli şəhərsalma və planlaşdırma tərəfindən dəstəklənən təbiətyönümlü həllər, yerli icmaların təşəbbüsləri və yerli şəraitə uyğunlaşdırılmış yanaşmalar vasitəsilə nail olmaq təklif edilir.
Sənəddə həmçinin milli və yerli hakimiyyət orqanlarının dayanıqlı infrastruktur, bərpa olunan enerji, əsas xidmətlər, təbii fəlakətlərə hazırlıq və onların qarşısının alınması, məşğulluğun təmin edilməsi və sosial əlaqələrin dəstəklənməsi sahələrindəki fəaliyyətləri ilə yanaşı, icmaların özləri tərəfindən həyata keçirilən lokallaşdırılmış, köklü və ənənəvi təcrübələrin gücləndirilməsinə dair çağırış da yer alır.
