WhatsApp-da Yeni Anonim Söhbət Funksiyası

WhatsApp istifadəçilərin məxfiliyinin qorunması istiqamətində çoxdan gözlənilən addımı həyata keçirməyə hazırlaşır. Platforma rəqibləri Telegram və Signal kimi istifadəçi adı sistemini tətbiq etmək üçün işini sürətləndirib. Artıq istifadəçilər telefon nömrələrini paylaşmadan söhbətə başlaya biləcəklər.
Elchi.az xəbər verir ki, TestFlight beta versiyasında ortaya çıxan bu xüsusiyyət WABetaInfo tərəfindən təsdiqlənib.
WhatsApp hazırda istifadəçi adı sisteminin həm interfeysini, həm də infrastrukturunu inkişaf etdirmək prosesindədir.
İstifadəçi adları necə işləyəcək?
“Technoblog”un məlumatına görə, bu funksiyanın əsas məqsədi istifadəçilərə nömrələrini paylaşmadan, xüsusən də tanımadıqları insanlarla əlaqə saxlamağa imkan yaratmaqdır. Yeni sistem aktivləşdirildikdə, sizi telefon nömrənizlə əlavə etməyən insanlar yalnız istifadəçi adınızı görəcəklər.
İstifadəçi adları aşağıdakı qaydalara tabe olacaq:
"www" ilə başlamaq mümkün deyil.
Ən azı bir hərf olmalıdır (yalnız rəqəmlər və ya simvollar etibarsız sayılır).
Etibarlı simvollar: kiçik hərflər (a–z), rəqəmlər (0–9), nöqtələr (.) və alt xətt (_).
İstifadəçi adı seçildikdən sonra WhatsApp seçimini konfeti animasiyası ilə qeyd edəcək və bu, platformanın daha müasir, məxfiliyə diqqət yetirən struktura keçidini simvolizə edəcək.