Vyetnamın mərkəzində güclü yağışların səbəb olduğu daşqın və torpaq sürüşmələri nəticəsində ölənlərin sayı 41-ə çatıb.
Elchi.az xəbər verir ki, bu barədə Vyetnamın Kənd Təsərrüfatı və Ətraf Mühit Nazirliyi yanında Bəndlərin İdarə Edilməsi və Fəlakətlərin Qarşısının Alınması Departamenti məlumat yayıb.
Onun sözlərinə görə, noyabrın 16-dan 20-dək aramsız yağan yağışlar, daşqınlar və torpaq sürüşmələri ən çox 16 nəfərin öldüyü Dak Lak və 14 nəfərin öldüyü Xanh Hoa əyalətlərinə ziyan vurub. Daha dörd nəfər Lam Donq əyalətində, üç nəfər Gia Lai əyalətində, iki nəfər isə Da Nang və Hue şəhərlərində ölüb.
Daşqınlar mərkəzi bölgədə 52 mindən çox evə ziyan vurub və sel suları altında qalıb. 13.000 hektardan çox kənd təsərrüfatı sahəsi və təxminən 2100 hektar meyvə bağları ciddi şəkildə zədələnib, 30.000-dən çox mal-qara və quş tələf olub.
Daşqın həm də ölkənin mərkəzi hissəsində və digər bölgələrlə avtomobil və dəmir yolu əlaqəsini ciddi şəkildə pozub. Ölkənin əsas magistral yollarında 30-dan çox sürüşmə və güclü daşqın baş verib. Əyalət avtomobil yollarında 140-dan çox sürüşmə qeydə alınıb.
Məryəm
