Ümumdünya Səhiyyə Təşkilatının (ÜST) baş direktoru Tedros Adhanom Qebreyesus Konqo Demokratik Respublikasında davam edən Ebola epidemiyasının indiyə qədər qeydə alınan ən ölümcül epidemiyanı geridə qoymaq üzrə olduğunu bildirib.
Elchi.az xəbər verir ki, mətbuat konfransında Qebreyesus bildirib ki, əgər 2026-cı ildəki epidemiya hazırkı tempdə davam edərsə, ən azı 11.000 insanın həyatına son qoyan 2014-2016-cı illərdəki epidemiyanı geridə qoyacaq.
Epidemiya bu il mayın 15-də elan edildiyindən bəri ən azı 4300 yoluxma halı aşkarlanıb və 2000-dən çox insan ölüb.
ÜST çərşənbə günü bildirib ki, virusun yayılmasını üç ay ərzində dayandırmağa ümid edir, lakin bu, epidemiyanın tamamilə dayandırılması demək deyil, əksinə ötürülmənin nəzarətdə saxlanılması deməkdir.
Epidemiyanın fevral ayında başladığı təxmin edilir
Epidemiyanın rəsmi olaraq may ayında elan edilməsinə baxmayaraq, səhiyyə rəsmiləri virusun ən azı üç ay əvvəl yayılmağa başladığını deyirlər.
ÜST-ün Afrika üzrə direktoru Dr. Məhəmməd Canabi epidemiyanın episentrinə yaxın olan Bunia şəhərində keçirilən mətbuat konfransında bildirib ki, “Biz virusun ardınca qaçırıq, amma virus bizdən qabaqdadır”. Canabi bildirib ki, tədqiqatlar göstərir ki, virus fevral ayında yayılmağa başlayıb və əvvəlcə malyariya və ya tif xəstəliyi ilə səhv salınıb. 2026-cı ildə baş verən epidemiyanın səbəbi əvvəllər yalnız iki dəfə, 2007 və 2012-ci illərdə müşahidə edilən nadir Bundibugyo Ebola virusudur.
Şayəstə
