Ukrayna Hərbi Kəşfiyyat Baş İdarəsinin (GUR) rəhbəri Kirill Budanov Rusiya ilə mümkün danışıqların mahiyyəti ilə bağlı diqqətçəkən açıqlama verib.
Musavat.com xəbər verir ki, Budanov bildirib ki, əgər tərəflərdən birinə şərtlər diktə olunur və o, bu şərtləri qəbul etməyə məcbur qalırsa, bunu danışıqlar adlandırmaq mümkün deyil.
Onun sözlərinə görə, real danışıqlar yalnız kompromis əsasında mümkündür: “Əgər biz deyiriksə ki, bizə şərtlər diktə olunur və biz onları qəbul edirik, bu artıq danışıqlar deyil, bu başqa cür adlanır. Danışıqlar kompromisin tapılmasıdır”.
Budanov vurğulayıb ki, söhbət asan və ya birtərəfli razılaşmadan getmir. Onun fikrincə, mümkün kompromis hər iki tərəf üçün ağrılı olacaq və heç kəsi sevindirməyəcək: “Bu kompromis sadə olmayacaq. O, heç bir tərəf üçün xoş və rahat olmayacaq. Söhbət qeyri-standart, bəlkə də gözlənilməz qərarlardan gedir. Bu qərarlar asan qəbul olunmayacaq”.
Ukraynalı kəşfiyyat rəhbərinin bu açıqlaması Rusiya-Ukrayna müharibəsi fonunda mümkün siyasi proseslər və gələcək danışıqların çətinliyi barədə ciddi mesaj kimi dəyərləndirilir.
