Ukrayna ilə Avropa Birliyi arasında Assosiasiya Sazişi qüvvəyə mindi ⋆ "ELÇİ"

Assosiasiya Sazişinin azad iqtisadi zona yaradılması haqqında bölümünün icrası isə 2016-cı il yanvarın 1-nə qaldı

Bunu da oxuyun

Pezeşkian ABŞ-nin Yaxın Şərq siyasətinin İslam ölkələrini yaxınlaşdırdığını bildirib

Ərdoğan vyetnamlı həmkarı ilə regional və qlobal məsələləri müzakirə edib

ABŞ, Yaponiya və Cənubi Koreya üçtərəfli tərəfdaşlıq yaradıb

Noyabrın 1-dən Avropa Birliyi ilə Ukrayna arasında imzalanan Asossasiya Sazişi qismən qüvvəyə minib. Sazişin yalnız Avropa Birliyi ilə Ukrayna arasında azad iqtisadi zona yaradılması haqqında bölümünün icrası 2015-ci il dekabrın 31-dək ertələnib. Bununla belə, Avropa Birliyi Ukrayna üçün birtərəfli qaydada ticarət güzəştlərini qüvvədə saxlayıb. 26 oktyabrda keçirilən parlament seçkilərinin nəticələrinə görə formalaşan Ukraynanın yeni koalision hökuməti azad ticarət zonasının şərtlərini təmin etməli, Ukrayna məhsullarının Avropa Birliyinə çıxarılmasının qarşısını alan texniki baryerləri qaldırmalıdır. Xəbəri unian.net yayıb.

Oktyabrın 31-də Ukrayna prezidenti Petro Poroşenko və Avropa Birliyinin rəhbərləri Herman van Pompey və Joze Manuel Barrozu birgə bəyanat yayaraq, Assosiasiya Sazişinin qismən qüvvəyə minməsini əməkdaşlığın önəmli addımı kimi qiymətləndiriblər: “Assosiasiya Sazişinin qüvvəyə minməsi Ukrayna xalqının Avropa Birliyi ilə sıx əməkdaşlığa ardıcıl dəstək verməsinin göstəricisidir. Oktyabrın 26-da Ali Radaya seçkisinin demokratik qaydada keçirilməsi də Ukraynanın bu yöndə atdığı çox vacib addımdır”.

Prezidentlər bəyan edir ki, Assosiasiya Sazişinin qüvvəyə minməsi gələn il Ukraynada vacib islahatların aparılması prosesinə də təkan verəcək: “Noyabrın 1-dən artıq Avropa Birliyi ilə Ukrayna qanunun aliliyi, cinayətkarlıq və korrupsiya ilə mübarizə, eləcə də sektoral əməkdaşlıq kimi önəmli sahələrdə işbirliyinə başlayır”.

Bəyanatda o da bildirilir ki, Assosiasiya Şurasının inaqurasiya mərasiminin bu ilin sonuna qədər keçirilməsi planlaşdırılır: “Avropa Birliyinin Ukrayna məhsulları üçün güzəştli gömrük şərtlərini qüvvədə saxlaması 2016-cı il yanvarın 1-də azad iqtisadi zonanın fəaliyyətə başlaması prosesini də asanlaşdıracaq. Ümid edirik ki, Avropa Birliyi ilə Ukrayna arasında Assosiasiya Sazişini ən qısa zamanda AB-nin bütün üzv dövlətləri milli prosedurlar nəzərə alınmaqla, ratifikasiyadan keçirəcək”.

Ukrayna Ali Radası Avropa Birliyi ilə Assosiasiya Sazişini 2014-cü il sentyabrın 16-da ratifikasiyadan keçirib. Həmin sənəddə tərəflər arasında azad iqtisadi zona yaradılacağı nəzərdə tutulsa da dəqiq tarix göstərilməmişdi. Bir sıra ekspertlər azad iqtisadi zonanın noyabrın 1-dən qüvvəyə minəcəyini proqnozlaşdırsalar da, Avropa Birliyi Ukrayna və Rusiya ekspertlərinin ortaq qərarı fərqli olub. Üçtərəfli məsləhətləşmələrdən sonra oktyabrın 23-də Avropa Birliyi ilə Ukrayna arasında imzalanan Assosiasiya Sazişinin azad iqtisadi zona yaradılması bölümünün 2015-ci il dekabrın 31-dək təxirə salınması haqqında qərar qəbul olunub.