Ukraynada “Eurovision-2017”nin təşkilinə görə məsuliyyət daşıyan Milli televiziyanın keçmiş sədri Zurab Alasaniya istefaya getmək niyyətini açıqlayıb. Onun sözlərinə görə, hazırda Kiyevdə baş verənlərin fonunda işləmək mümkün deyil.

Alasaniya bildirib ki, Ukrayna beynəlxalq musiqi müsabiqəsinin keçirilməsinə bir qəpik də ayırmayıb. Üstəlik, xeyli bürokratik əngəllər törədilir.

– İşlərin qaydasında getməsi üçün əvvəla, Nazirlər Kabineti qəbul etdiyi qərarları dəyişməlidir. İndiki qaydalarla biz ayına 12-15 min avro tələb edən avropalı mütəxəssisləri işə götürə bilmirik. Bu, tender şərtlərindən qırağa çıxır,- deyə Alasaniya bildirib.

O, vurğulayıb ki, hazırda Ukraynada dövlətin pullarından ancaq hakimiyyətə yaxın insanlar faydalana bilirlər. Ona görə də, belə vəziyyətdə işləməkdənsə, istefa vermək daha məqbuldur.