“Ozan Can Kökçünün Azərbaycan millisindəki çıxışlarını və Niderlandda keçirdiyi oyunları izləyirdik. Türk olması da marağımızı artırırdı. Təxminən iki ildir onu transfer etmək istəyirdik və nəhayət, istəyimizə nail olduq”.
Elchi.az xəbər verir ki, bunu Teleqraf-a açıqlamasında Türkiyə I Liqa təmsilçisi “Vanspor”un baş məşqçisi Murat Yıldırım Ozan Can Kökçünün transferindən danışarkən deyib.
Mütəxəssis 27 yaşlı yarımmüdafiəçinin iki illik müqavilə əsasında komandaya cəlb olunmasından söz açıb.
Yıldırımın sözlərinə görə, Ozanın keçidi heç də asan başa gəlməyib:
“Ozan Can Kökçü uzun müddətdir izlədiyimiz futbolçudur, qardaş ölkə Azərbaycanın milli komandasının üzvüdür. Bundan əlavə, qardaşı Orkun Kökçü də Türkiyə millisində çıxış edir. Ona görə də Ozanı yaxşı tanıyırıq. Oyun üslubları da bir-birinə bənzəyir. Heyətimizdə Avropa və milli komanda təcrübəsi olan futbolçuya ehtiyac var idi. Ötən mövsüm komandanı yenidən I Liqaya yüksəltdikdən sonra ayrılmışdım, bu mövsüm isə geri qayıtdım. Qayıdandan sonra rəhbərliyə Ozan barədə məlumat verdim və onu transfer etməli olduğumuzu bildirdim. Bunun üçün xeyli çalışdıq. Danışıqlar kifayət qədər gərgin keçdi. Ozan Can bizim istədiyimiz tipdə futbolçudur. O, yarımmüdafiədə müxtəlif mövqelərdə oynaya bilir – mərkəzdə, cinahda və digər rollarda. Keyfiyyətli oyunçu olduğu üçün komandamıza böyük fayda verəcəyinə inanırıq. Buna görə də ilk transferimizi Ozan Can Kökçü ilə reallaşdırdıq”.
Baş məşqçi Azərbaycan millisinin üzvündən gözləntilərini də bölüşüb:
“Ozan Canın meydandakı dinamizmini, atletizmini, oyun görüşünü və xarakterini yaxından təhlil etmişik. Ondan gözləntimiz həm meydanda, həm də meydandan kənarda liderlik etməsidir. Qarşıya qoyduğumuz çətin hədəflərə gedən yolda komandaya dəstək verməsini istəyirik. Dünən axşam da onunla söhbət etdik. Əsas məqsədimiz pley-off mərhələsinə yüksəlməkdir. Bu yolda bizə böyük töhfə verəcəyinə inanırıq və ondan çox şey gözləyirik”.
Murat Yıldırım Azərbaycandan “Sabah”, “Qarabağ” və “Araz-Naxçıvan” klublarının futbolçularını da izlədiklərini bildirib:
“Onlarla bağlı qərarı qarşıdakı dövrdə verəcəyik. Həqiqətən də keyfiyyətli oyunçular var və onlar haqqında hesabatlar hazırlayırıq. İzlədiyimiz futbolçular arasında həm azərbaycanlılar, həm də legionerlər var. Hazırda daha 3-4 futbolçunu diqqətdə saxlayırıq, hələ yekun qərar verməmişik.
Azərbaycan Premyer Liqasını yaxından izləyirik. Dünən “Qarabağ”ın da bir futbolçusunu izlədik. Qarşıdakı günlərdə şərtlər uyğun olarsa, növbəti həftələrdə transferlərlə bağlı rəsmi addımlar ata bilərik”.
Baş məşqçi sözügedən futbolçunun Elvin Cəfərquliyev olub-olmadığı barədə sualı belə cavablandırıb: “Elvin Cəfərquliyev yaxşı futbolçudur, amma biz ilk növbədə komandadakı çatışmazlıqları nəzərə alırıq. Hansı mövqelərdə ehtiyacımız varsa, həmin yerlərə uyğun oyunçular transfer etməyə çalışacağıq”.
Xatırladaq ki, Ozan Can Kökçü son olaraq Niderlandın “Volendam” klubunun formasını geyinib.
