ABŞ Prezidenti Donald Trampın media nəhəngləri arasındakı mübarizədə tərəfsiz olduğunu bəyan etməsinə baxmayaraq, pərdəarxası məqamlar fərqli reallıqdan xəbər verir.
“Paramount” şirkətinin icraçı direktoru (CEO) Devid Ellison ötən həftə Ağ Evə qayıdaraq Prezident Donald Trampla qapalı görüş keçirib. Bu görüş “Paramount”un “CNN” və “Warner Bros. Discovery”ni (WBD) ələ keçirmək üçün apardığı aqressiv mübarizə fonunda baş tutub.
İki gün əvvəl görüş, iki gün sonra təkzib
Mənbələrin verdiyi məlumata görə, Ellison və Tramp ötən həftənin əvvəlində iki genişmiqyaslı söhbət aparıblar. Lakin bu görüşlərin zamanlaması kifayət qədər diqqətçəkəndir. Belə ki, görüşdən cəmi bir neçə gün sonra — çərşənbə günü NBC telekanalına müsahibə verən Tramp, “Paramount” və “Netflix” arasındakı rəqabətlə bağlı suala: “Mən bu işə qarışmamışam”, — deyə cavab verib.
Bu, Trampın mövqeyində kəskin dönüş kimi qiymətləndirilir. Çünki o, daha əvvəl bu prosesdə iştirak edəcəyinə dair siqnallar vermiş və “Paramount”a olan rəğbətini gizlətməmişdi.
Böyük media savaşı: Kim qalib gələcək?
Hazırda Tramp administrasiyasının tənzimləyici qurumları “Netflix”in “Warner Bros.” studiyasını və “HBO”nu satın almaq sövdələşməsini nəzərdən keçirir. “Paramount” isə bu müqaviləni bloklamağa çalışır və bütün “WBD”ni (o cümlədən “CNN”i) almaq üçün səhmdarlara birbaşa təklif göndərib.
Tramp NBC-yə müsahibəsində hər iki tərəfin — həm Ellisonun, həm də “Netflix”in rəhbəri Ted Sarandosun onunla əlaqə saxladığını etiraf edib:
“Görünür, mən çox güclü prezident hesab olunuram. Hər iki tərəf mənə zəng edir. Amma qərara gəldim ki, qarışmamalıyam. Ədliyyə Nazirliyi bu işlə məşğul olacaq.”
Ədliyyə Nazirliyindən “Netflix” addımı
Trampın müsahibəsindən cəmi iki gün sonra “The Wall Street Journal” Ədliyyə Nazirliyinin “Netflix”ə qarşı “antiinhisar qaydalarını pozma” şübhəsi ilə araşdırma başlatdığını yazıb. “Netflix” isə bu iddiaları təkzib edərək, bunun standart bir prosedur olduğunu bildirib.
Ellison və Tramp ailələrinin yaxınlığı
Devid Ellisonun Ağ Evə mütəmadi səfərləri təsadüfi deyil. Onun atası, “Oracle” şirkətinin milyarder həmtəsisçisi Larri Ellison Donald Trampın ən yaxın müttəfiqlərindən və dəstəkçilərindən biridir.
Ötən ilin dekabrında yayılan məlumatlara görə, Devid Ellison Tramp administrasiyasına söz verib ki, əgər “Warner Bros.”u alsa, “CNN” telekanalında köklü dəyişikliklər edəcək. Tramp da öz növbəsində “CNN”in hazırkı rəhbərliyini “rüsvayçılıq” adlandıraraq, kanalın satılmasının vacib olduğunu vurğulamışdı.
Xatırladaq ki, Tramp daha əvvəl Ellison ailəsi haqqında danışarkən: “Onlar mənim dostlarımdır və məni böyük dərəcədə dəstəkləyirlər. Onlar düzgün olanı edəcəklər”, — demişdi.
