ABŞ Prezidenti Donald Tramp Cənubi Koreyanın ABŞ-da 200 milyard dollarlıq yeni enerji investisiyası həyata keçirəcəyini elan etdi. Tramp bildirdi: “Keçən il Prezident Li ilə əldə etdiyimiz 350 milyard dollarlıq razılaşma çərçivəsində ölkəmizdə Amerika enerjisi və Amerika gücü potensialını inkişaf etdirəcəyik”.
Elchi.az xəbər verir ki, ABŞ Prezidenti Tramp “Truth Social” hesabında paylaşdığı yazıda Nyu-Yorkda BMT Baş Assambleyası çərçivəsində Cənubi Koreya Prezidenti Li Çe-myunq ilə keçirdiyi görüşü şərh etdi. Görüş zamanı enerji sahəsində əməkdaşlığın müzakirə olunduğunu qeyd edən Tramp dedi: “Onların ABŞ-da 200 milyard dollarlıq yeni investisiya yatırması barədə razılığa gəldik. Keçən il Prezident Li ilə imzaladığımız 350 milyard dollarlıq Koreya Strateji Ticarət və İnvestisiya Sazişi çərçivəsində ölkəmizdə Amerika enerjisi və Amerika gücü potensialını inkişaf etdirəcəyik”. Cənubi Koreyanın investisiya öhdəliklərini nəhəng tikinti layihələrinə və on minlərlə iş yerinə çevirdiklərini vurğulayan Tramp bunları söylədi: “Bunlar ABŞ-da enerji gücünü artıran nəhəng enerji layihələridir. Bu, Amerika işçiləri üçün yeni tikinti, yeni istehsal və əla iş imkanları deməkdir”.
“Dəyəri 120 milyard dollar olan 8 nüvə reaktoru tikiləcək”
ABŞ-da həyata keçiriləcək enerji investisiyaları ilə bağlı təfərrüatları açıqlayan Tramp dedi: “İlk növbədə, ölkəmiz və Cənubi Koreya, altısı ‘Westinghouse AP1000’ modeli, ikisi isə Koreya istehsalı olan ‘APR-1400’ modeli olmaqla, 8 irimiqyaslı reaktorun tikintisini nəzərdə tutan 120 milyard dollarlıq nüvə enerjisi proqramı üzrə irəliləyirlər”. Tramp bu layihənin ABŞ-ın enerji təhlükəsizliyinə töhfə verəcəyini vurğuladı.
Şayəstə
