Qazaxıstan prezidenti Kasım-Jomart Tokayev iki il ərzində silahlı qüvvələrdə və hərbiləşdirilmiş strukturlarda hərtərəfli islahatların aparılmasının, eləcə də ölkənin müdafiə potensialının artırılmasının zəruriliyini bəyan edib.
Elchi.az xəbər verir ki, bu barədə dövlət başçısının mətbuat xidməti məlumat yayıb.
“Biz öz müdafiə potensialımızı artırmalıyıq və ilk növbədə, silahlı qüvvələrin texnoloji modernləşdirilməsini davam etdirməliyik… Silahlı qüvvələrimizdə və hərbiləşdirilmiş strukturlarımızda dərin islahatlar aparmalıyıq. Bu, strateji əhəmiyyətli vəzifədir və tezliklə, iki il ərzində yerinə yetirilməlidir”, – deyə Tokayev Vətən Müdafiəçisi Günü münasibətilə keçirilən tədbirdə bildirib.
Prezident bu keşməkeşli vaxtlarda islahatları təcili tələb adlandırıb. O, münaqişənin həllinin diplomatik üsullarına sadiqliyini bir daha təsdiqləyib, lakin xəbərdarlıq edib ki, ölkə zəruri hallarda öz maraqlarını güc yolu ilə müdafiə etməyə hazır olmalıdır.
Qazaxıstan lideri əlavə edib ki, ölkə beynəlxalq hüququn prinsip və normalarına ciddi əməl etməli və dünyanın bütün ölkələri ilə dostluq münasibətlərini bundan sonra da möhkəmləndirməlidir. Onun sözlərinə görə, bu dəyişməz prinsiplər yeni konstitusiyada açıq-aydın təsbit olunub, lakin bu o demək deyil ki, biz boş otura bilərik.
Qeyd edək ki, Qazaxıstanda mayın 7-də Vətənin Müdafiəçisi Günü qeyd olunur. 1992-ci ilin bu günü Nursultan Nazarbayev milli ordunun yaradılması haqqında fərman imzalayıb. 2012-ci ildən bu bayram dövlət bayramıdır.
Yeganə
