Şüvəlanda xeyirxah aksiya- pulsuz geyim paylanılır

Artıq 1 həftədir ki, qəsəbənin mərkəzi küçəsində yerləşən bu mağazaya insan axını var. Mağaza hər gün günorta saat 14:00-dan axşam saat 17:00-dək fəaliyyət göstərir. Bu vaxt ərzində həm müraciət edən imkansız insanlara paltar götürmək imkanı yaradılır, həm də xeyirxah insanların gətirdikləri paltarlar qəbul edilir.

Şüvəlan sakinləri deyir ki, hər gün günorta saatlarında obyektin qarşısında onlarla növbəsini gözləyən adam görmək mümkündür. Aksiyadan yararlanmaq istəyənlər təkcə Şüvəlan qəsəbəsinin əhalisi deyil və digər qonşu qəsəbələrdən, hətta rayonlardan da gələnlər var. Hər kəs ehtiyacı olan paltarı götürsə də, bəzən daha çox paltar götürmək istəyənlərə də rast gəlinir. Təşkilatçılar deyir ki, belə hallarda insanların qəlbini qırmaq istəmədikləri üçün maksimum anlayışlı bir şəkildə onları başa salırlar.

Təşkilatçı Fuad Əliyev xeyriyyə aksiyasının bir həftədir davam etdiyini və insanların  kütləvi şəkildə axın etdiyini dedi: “Bir həftədir ki, aksiyanı təşkil etmişik. Əslində ideyanı Türkiyədən götürmüşük. Bu xeyirxah işi çox bəyəndik və bir neçə dost əl-ələ verib, bu cür xeyriyyə aksiyalarını təşkil etməyi qərara gəldik. Xeyirxah insanlar sağ olsunlar ki, aksiyaya dəstək verirlər. Paltarların saxlanılması üçün bu mağazanı bizə bir xeyirxah şəxs təmənnasız  verib. Bizim məqsədimiz kimdənsə pul almaq və yaxud maddiyyat güdmək deyil. Sadəcə, insanlardan xahişimiz odur ki, istifadə etmədikləri geyim əşyalarını, paltarları buraya gətirsinlər. Bizim öhdəmizə düşən vəzifə isə əzik və çirkli paltarları öz hesabımıza ütüləyib və təmizləyib imkansız ailələrə çatdırmaqdır. Yaxşı olar ki, paltarları təmiz və ütülənmiş halda gətirsinlər”.

Təşkilatçı xeyriyyə aksiyasında paltar fırıldaqçılarına rast gəldiklərini də dedi: “Ehtiyacın varsa, götür, ehtiyacın yoxdursa, as” şüarı altında təşkil olunan xeyriyyə aksiyasında bəzən anlaşılmazlıqlar da olur. Biz də insanları başa düşürük. Lakin istənilən paltar və yaxud geyim əşyası bərabər şəkildə paylaşılmalıdır. Heç kimə fərq qoyulmur. Gətirilən paltarları bərabər şəkildə bölüşdürürük. Lakin bununla bəzi fırıldaqçılar da öz əməlindən geri qalmır. Bir şəxs bir neçə dəfə geyim əşyası götürmək istəyir. Bu halların qarşısını almaq üçün siyahı tuturuq. Hər kəsə nömrələr paylanılır və onun qarşılığında paltar verilir və dərhal nömrə həmin şəxsdən alınır. Bundan əlavə, texnika və məişət əşyaları da gətirənlər olur. Lakin o barədə hələ ki planlaşdırma aparmamışıq. Qısa zamanda bu kimi əşyaların siyahılaşdırma prosesinə başlayacağıq. Bunun üçün də təşkilatçılığı gücləndirmək və böyütmək lazımdır. Məişət avadanlıqları üçün evlərə gedib yoxlamaq lazımdır. Bunun üçün bir neçə işçi heyəti götürmək lazımdır. Lakin təmənnasız olaraq insanları cəlb etmək mümkün deyil. İnanırıq ki, hökumətimiz də bu işlərdə bizə yardım edəcək. Hazırda 5-6 nəfərlə bu işləri davam etdiririk. Çox yorğun və gərgin işdir. Hər gün iş vaxtımızdan bir neçə saat ayırıb bu işə sərf edirik. Zəhmət tələb edən iş olsa da, çalışırıq ki,  imkanı olmayan insanlara əlimizdən gələn yaxşılığı, köməkliyi göstərək. Hətta xaricdən də aksiyaya dəstək olmaq istəyənlər var. Bu yaxınlarda xeyli sayda kişi, qadın, uşaq geyimləri göndərəcəklər. Allah yardım edən hər kəsdən razı olsun”.