“Əvvəllər məni çox düşündürən sualların bəzilərinə cavab tapmaqdayam. O suallardan biri beləydi: kənd camaatının əksəriyyəti təmiz havada yaşadığı, əsasən ekoloji təmiz qidalar yedikləri halda, nədən uzun ömürlü olmurlar? Ona görə də kəndlərdə olduğum halda, uzun illərdir ki, sosioloq marağı ilə bu məsələni araşdırıram”.
Elchi.az xəbər verir ki, bu sözləri sosioloq-alim Əhməd Qəşəmoğlu Feysbuk hesabında yazıb:
“Gəldiyim konkret nəticələr var. Bir çox məsələlərlə yanaşı(məsələn işin çoxluğu, həyat şəraitinin çətinliyi və s.) bu uzunömürlülüyün qarşısını alan əsas səbəblərdən biri əhalinin sağlamlıq mədəniyyəti, qida mədəniyyəti ilə bağlı məlumatlarının az olmasıdır. Kənd evilərində tez-tez müşahidə etdiklərim: insanların bir çoxu əllərinə nə gəldi yeyirlər. Bir-biri ilə uyğun olmayan yeməklər yeyirlər. Yatana qədər yeyirlər. Ən xoşagəlməz hallardan biri odur ki, insanların dərman bitkiləri barədə lazımi məlumatları yoxdur. Halbuki, öz həyatyanı sahələrində, ətraflarında xeyli dərman bitkiləri var. Bəzi xəstəlikləri müalicə edə bilən ev xörəkləri barədə, hətta bal şərbətinin faydaları barədə belə məlumatları yoxdur. Halbuki, yaxın illərə qədər əhali arasında belə ağbircəklər, ağsaqqalar vardı. Təəsüf ki, indi yoxdur. İnsanlarımız daha çox naşı həkimlərin məsləhət bildiyi, keyfiyyəti sual altında olan aptek dərmanlarına üstünlük verirlər. Mənim konkret müşahidələrimə görə, bizim əhalinin böyük bir hissəsi bu sahədə məlumatlarının, vərdişlərinin aşağı olması hesabına dünyadan köçürlər!!!!
TƏKLİFİM: Təcili şəkildə təhsil sistemində sağlamlıq, qida mədəniyyəti ilə bağlı mühüm maarifləndirmə işləri aparılmalıdır. Müəllimlər hazırlanmalı, dərsliklər yazılmalı, dərslər keçirilməlidir. Əhali hansı fənnisə zəif bilsə də, hansısa peşə öyrənməklə öz həyatını təmin edə bilər. Amma sağlamlıq, qida mədəniyyəti aşağı olan insanların həm özləri, həm də cəmiyyət üçün xeyli problemlər yaranır.
TV – lərimiz bu sahədə yüksək reytinqli verilişlər hazırlamalıdırlar. Jurnalistlərimiz bu məsələləri diqqət mərkəzində saxlamalıdırlar. Pedoqoji və tibb sahəsində təhsil verən təhsil müəssisələri öz tələbələrini xüsusi olaraq hazırlamalıdır və s.
Əziz dostlar! Təbii ki, sizlərin də öz münasibəti, təklifləri ola var. Mümkünsə onları da bildirin”.
Son şərhlər