Bu həftə narazı cəbhəçilərin Razi Nurullayevin başçılığı ilə yaratdıqları Azərbaycan Xalq Cəbhəsi Partiyası (AXCP) Etimad Qurultayı Təşkilat Komitəsinin üzvü, münaqişəşünas (konfliktoloq) Cavid Musazadə onları birbaşa Əli Kərimlinin təlimatı ilə tənqid edən cəbhəçilərə çağırış edib.

AzVision.az-a göndərilən çağırışı olduğu kimi təqdim edirik:

“Guya biz bu addımı atmasaydıq siz seçkidə uğur əldə edib ölkədə dəyişikliyə nail olacaqdınız?. Xalqın və cəbhəçilərin ac qarnı sizin absurd iddialarınıza, qaragüruhunuza, mənasız işlərinizə çoxdan doyub. Gedin özünüzə yeni sənət tapın. Siyasət sizlik deyil. 300-500 adamı zəlzələdən, vəlvələdən təsir altına salıb acqarına döyəclətdirdiyiniz, tutdurduğunuz bəsdir. Çarəsiz insanların heysiyyatıyla oynamaq, acı taleyi üzərində özünə siyasi köşk qurub alver etəmək doğru deyil. Yanlışlarınıza son verin.

23 il nəticə əldə etməmisiniz. Müxtəlif gülünc bəhanələr gətirərək guya tini donüb gəlirdiniz, Rauf Arifoğlu qoymadı, guya tini dönüb gəlirdiniz, Qüdrət Həsənquliyev əngəl oldu, guya tini donüb gəlirdiniz, Rüstəm İbrahimbəyov badalaq atdı və.s. Bu sayaq gülünc bəhanələrlə hakimiyyətin qalmağına xidmət göstərərək həyat sürdüyünüz bəsdir. Kasıb insanların 1001 əzab – əziyyətlə, zülmlə qazandığı 3-5 manata şərik olub yaşamaq nə əqidəyə, nə də kişiliyə sığar. Məhz, siz bu rejimin formalaşmağına şərait yaratmısınız, məhz siz bu rejimin möhkəmlənməyinə xidmət etmisiniz. Zaman-zaman hər kəsin əməllərinə aydınlıq gətiriləcək. Özünüz şahidi olacaqsınız.

Mən əsl cəbhəçilərə müraciət edirəm: Bir daha düşünün. Ağlınızla qərar verin. Zombi stereotipini qırın. Əsl siyasətə gəlin. Siyasət zombilik deyil. Maraqların uzlaşması və mümkün olanı əldə etmək fəaliyyətidir. Sizi “əqidəyə”, “kişiliyə”, “xarakterliliyə” kökləyib qul kimi istismar edirlər. Ayılın, doğru yolu seçin!…