Misir cavab olaraq Liviyadakı İŞİD mövqelərinə zərbə endirib
İnternetdə İŞİD qruplaşmasının Misir vətəndaşı olan 21 kopt-xristianını edam etməsinin kadrları yayıldıqdan sonra Misir Hərbi-Hava Qüvvələri Liviyanın Derna şəhərindəki İŞİD mövqelərinə aviazərbələr endirib.
ANS PRESS xəbər verir ki, bu barədə “Reuters” agentliyi Misir dövlət televiziyasına istinadən xəbər verir. Liviyada əsir götürülən 21 misirli balıqçının İŞİD üzvləri tərəfindən edam edilməsini əks etdirən kadrlar dünən axşam internetdə yayılıb.
Misir prezidenti Əbdül Fəttah əs-Sisi televiziya ilə müraciətində bəyan edib ki, Qahirə İŞİD döyüşçülərinin misirli əsirləri edam etməsinə cavab tədbiri hüququnu qoruyub saxlayır. “Qoy uzaqda və yaxında olanlar bilsinlər ki, misirlilərin onları qoruyan qalxanı var. Misirin həmin cinayətkarlara münasib vaxtda və münasib tərzdə cavab vermək hüququ var. Mən Milli Müdafiə Şurasına bu məsələni izləməyi tapşırmışam. Həmçinin Liviyadakı vəziyyətlə əlaqədar, hökumətə Misir vətəndaşlarına qarşı Liviyaya səyahət qadağasının tətbiq edilməsini göstəriş vermişəm”, – Misir prezidenti belə deyib.
Misirdəki Kopt-xristian Kilsəsi İŞİD videosunun həqiqət olduğunu təsdiqlədikdən sonra, ölkədə 7-günlük matəm elan edilib.
ANS PRESS
