Yanvarın 12-də Avstriyanın paytaxtı Vyanada keçiriləcək rəsmi sessiyada Avropada Təhlükəsizlik və Əməkdaşlıq Təşkilatına (ATƏT) sədrlik Polşadan Şimali Makedoniyaya keçəcək.
Elchi.az Türkiyə mediasına istinadən xəbər verir ki, ATƏT-dən verilən yazılı açıqlamada, ATƏT-ə sədrlik edən Şimali Makedoniya xarici işlər naziri Bujar Osmaninin qiymətləndirmələrinə yer verilib.
Osmani deyib: “2023-cü il üçün ATƏT-ə sədrliyi qəbul etmək böyük məsuliyyət və şərəfdir. Məqsədimiz diqqəti xalqın maraqlarına və ehtiyaclarına uyğun olaraq Helsinki Yekun Aktının prinsiplərinə yönəltmək olacaq”.
Xüsusilə münaqişə bölgələrində köməyə və dəstəyə ehtiyacı olan insanlara kömək etməyi hədəflədiklərini qeyd edən Osmani, “ATƏT-i böhranların aradan qaldırılmasında və sülhün təşviqində daimi təminatçısı kimi görürük”,-deyib.
Osmani Rusiya-Ukrayna müharibəsinə də toxunaraq, “Ukraynaya qarşı səbəbsiz başlayan təcavüz müharibəsi Avropa təhlükəsizlik arxitekturasını sarsıtdığı üçün qitədə və onun hüdudlarından kənarda sülh və sabitliyi təhdid edir”,-söyləyib.
Avropanın təhlükəsizliyi və sabitliyi üçün bu kritik vaxtlarda Şimali Makedoniyanın müddətli prezident kimi fəaliyyətində ATƏT-in prinsiplərinə ciddi şəkildə riayət ediləcəyini bildirən Osmani deyib:
“ATƏT dəyərlərinin qorunması və beynəlxalq hüquqa hörmət ümumi prioritet olmalıdır. Bu, son dərəcə vacibdir. Etibarın bərpası və mənalı dialoqun qurulması ATƏT-in razılaşdırılmış prinsiplərinə tam riayət etməyi tələb edir. Biz hamımız öz əməllərimizə cavabdeh olmalıyıq. Bu, irəliyə doğru yolun formuludur”.
Yeganə
Son şərhlər