“Sahilsiz təzadlar”

AYB.az xəbər verir ki, dekabr ayının 10-da Azərbaycan Yazıçılar Birliyinin Natəvan klubunda biologiya üzrə fəlsəfə doktoru Sadıq Qarayevin “Sahilsiz təzadlar” kitabının təqdimat mərasimi keçirilib.

“Nurlar” nəşriyyatında çap olunan kitab bəşəriyyətin dünyagörüşündəki təzadlı, çoxüzlü baxışlar sistemi və mövqeyindəki ətalət, çoxbucaqlı standartlar sayəsində Xocalıda, Somalidə, Əfqanıstanda, Yaxın Şərqdə, eləcə də dünyanın digər yerlərində vəhşicəsinə qətlə yetirilmiş, aclıqdan, susuzluqdan dünyasını vaxtsız dəyişmiş, insanlığın vicdan indikatorları olan uşaqların əziz  xatirəsinə ithaf edilir.

Kitaba ön sözü akademik İsa Həbibbəyli yazmışdır, redaktorları filologiya üzrə fəlsədə doktoru Dilarə Məmmədova və Esmira Fərəcovadır.

“Sahilsiz təzadlar” bədii, elmi, fəlsəfi və dedektiv romandır. Romanda qəhrəmanların və digər obrazların vasitəsilə bir sıra elmi, fəlsəfi ideyalar, fərziyyələr irəli sürülmüş, müzakirə olunmuşdur. Bundan əlavə əsərdə rənglərin əmələ gəlməsi, kainatın yaranması, zamanın, sürətin və sahələrin arasıkəsilən mahiyyətdə olması, təxmini, dürüst, real məntiq və digər məsələlər barədə mülahizələrlə yanaşı, bəşəriyyətin qlobal problemləri haqqında fikirlər də yer almışdır.

“Xocalı soyqırımını tanıtma” İctimai Birliyinin və Azərbaycan Yazıçılar Birliyi AYBKİTAB saytının təşkilati dəstəyi ilə keçirilən tədbir Azərbaycanın Dövlət Himninin sədaları altında başlayıb.

Tədbiri giriş sözü ilə açan “Xocalı soyqırımını tanıtma” İctimai Birliyinin sədri, “Ana harayı” qəzetinin baş redaktoru Şamil Sabiroğlu qonaqları salamladıqdan sonra  kitabın işıq üzü görməsi münasibətilə müəllifi təbrik edib, kitabın Türkiyədə nəşr olunmasının nəzərdə tutulduğunu diqqətə çatdırıb.

Azərbaycan Yazıçılar Birliyi Mətbuat Xidmətinin rəhbəri, şair Xəyal Rza  çıxışında “Sahilsiz təzadlar” kitabının başqa dillərə tərcüməsinin vacibliyinin vurğulayıb.

Tədbirdə  çıxış edən professor Telmam Əliyev  “Sahilsiz təzadlar” kitabı haqqında fikir və düşüncələrini tədbir iştirakçıları ilə bölüşüb: “Bu əsər mürəkkəb quruluşlu əsərdir. Onun janrını müəyyənləşdirmək, sözün müsbət mənasında çətindir. Mən bu nəhəng əsəri sözbəsöz oxuyub qərara gəldim ki, bu elmi-publisistik, yarımsənədli, yəni prototipləri məlum olan, bədii-fəlsəfi əsərdir. Mən ömrümdə bu roman qədər təsirli, elmi yeniliklərlə dolu olan əsər oxumamışam. Onun müasir oxucuda yaratdığı təsiri indiki 70-90 yaşlı adamların gənc vaxtlarında böyük yazıçımız Məmmd Səid Ordubadinin “Qılınc və qələm” romanının yaratdığı təsirlə müqayisə edərdim”.

Millət vəkili Fazil Qəzənfəroğlu “Sahilsiz təzadlar”ı çox müdhiş müşahidələr olan əsər kimi dəyərləndirib, bu janrın Azərbaycana gəlməsini təqdirəlayiq hal kimi qiyməytləndirib: “Bu roman elmi diskussiyanın ədəbiyyata gətirilməsinin Azərbaycanda ilk nümunəsidir. Əsərdə iqtisadi problemlərin, proseslərin insanların həyatında müzakirəsi təsvir olunur, yeni fikirlər söylənilir. Müəllif müqayisəli maraqlı fikirləri,  özünün düşündüyü elmi tezisləri, hüquqla dəqiq elmlərin müqayisəsini əsərdə verir”.

Təqdimat mərasimində Əsəd Cahangir, Bahar Bərdəli, Vaqif Nəcəfzadə, Mərziyyə Nəcəfova və başqaları çıxış edərək “Sahilsiz təzadlar” romanı haqqında ürək sözlərini tədbir iştirakçıları ilə bölüşüblər, müəllifə yeni yaradıcılıq uğurları arzulayıblar.

Sonda çıxış edən Sadıq Qarayev təqdimat mərasiminin keçirilməsinə görə Azərbaycan Yazıçılar Birliyinin rəhbərliyinə, iştirakçılara minnətdarlığını bildirib, kitablarını imzalayaraq oxucularına təqdim edib.

AYB.az

Məlahət Qənbərova