Sahibkardan Əli Kərimliyə növbəti ağır ittihamlar…

Azər Əsgərov bu profillərin saxta olduğunu iddia edir. O, bu prosesin birbaşa AXCP rəhbərliyi tərəfindən təşkil olunduğunu deyir. Bu barədə musavat.com-a açıqlamasında mülk sahibi bunları deyib: “Mənə qarşı başlayan kampaniya dayanmır. Hər gün təhqir eşitməkdən artıq təngə gəlmişəm. Bunlar Əli Kərimli və ətrafının öyrətdiyi səviyyəsiz insanlardır. Mən hakimiyyətdən çəkinmədən kişi kimi yerimi onlara verdim. Haqlı olaraq da onlardan bu hərəkətin cavabını gözləyirdim. Amma təəssüf ki, görmədim. Əvəzində nakişilik gördüm. Bu günə kimi 1 manat da kompensasiya almamışam. AXCP rəhbərliyi isə hələ də susur. Məni satqın adlandırırlar. Satılmış mən yox, Əli Kərimli, sənsən. Bununla arenada özünə imic qazanmaq istəyirsən. Mülkümün əvəzində külli miqdarda pul alaraq, məni və məsum cəbhəçiləri satan sənsən. Sənin kimi müxalifətlə döyüşə hazıram. Pulun müqabilində satılmaq sənin qanındadır. 11 ayda yığdığını 21 ildir yeyib qurtara bilmirsən. Gəldiyim qənaət ondan ibarətdir ki, müxalifət hakimiyyətdən qəddardır. Rəydə təhqir yazanlara cavabım odur ki, lideriniz mənə cavab versin. Sizlərdən qul kimi istifadə edirlər. Bütün hədələrə baxmayaraq, sona qədər kişi kimi sözümün üstündə dayandım. Amma sizlər məni meydanda tək qoydunuz. Üzərimdən alverə girərək, haram pullar qazandınız. Avropa Məhkəməsinə qədər bu işi aparacam. Tək qalsam belə. Sizlərə qərargah verdiyimə görə özüm-özümü söyürəm. Cəbhəçilərə gərək yoxdur”.

Mülk sahibi “Yeni Müsavat”a müsahibə verdiyinə görə cəbhəçilər tərəfindən təhqirlərin daha çox artdığını da qeyd etdi: “Siz daim problemləri olan vətəndaşın yanında olduğunuza görə mənə kömək edirsiniz. Bunlar elə zənn edirlər ki, hamı özləri kimi satqındır. Nəvəm yaşda olan cəbhəçi bəzi gənclər küçə söyüşləri ilə məni təhqir edirlər. Təhqirlərə görə məhkəməyə müraciət etməyi düşünmürəm. Mən kişilərlə mübarizə aparmağı sevirəm. Nakişilərlə yox. Bunlar hakimiyyətə gəlsələr, insanları asarlar. Sizlər müxalifət deyilsiniz. Bir qrup başıpozuq adamlardır. Əli Kərimlinin ətrafına yığılıblar. Əxlaqa yaraşmayan işlərlə məşğuldurlar. Hamısı bir mərkəzdən idarə olunur. Guya ki, nəyəsə nail olacaqlar. Mülkümlə bağlı məhkəməmdə bir yenilik yoxdur. Cəbhəçilərə görə mülkümdən məhrum oldum. Mənə çatan məlumata görə, Əli Kərimli mülkümün müqabilində böyük məbləğdə pul alıb. O, satılmış müxalifətdir. Mülkümü ƏIi Kərimli dövlətə satıb. Bir daha bildirirəm ki, mənim əmlakıma ötəri ziyan dəymişdi. Təhlükə ciddi deyildi. Bir mülkümü qoruya bilməyən Əli Kərimli, hakimiyyətə gəlsən 9 milyonun mülkünü necə qoruyacaqsan? Xalq səni çoxdan tanıyır. Ona görə arxanca gəlmir. Sənin yoldaşın Londonda iki qoruma ilə gəzir. Uşaqların da həmçinin. Bu qədər pulları haradan alırsan? Məni sosial şəbəkələrin inboxunda saxta qız profilləri ilə təhqir etdirirsən. Əli Kərimli, bilirəm ki, bundan sənin birbaşa xəbərin var. Qız belə söyüşlər yazmaz. Bilirəm ki, kişidir. Etdiyiniz hərəkətlərdən utanın. Üzbəüz sözünüz varsa, deyin. Arxadan danışmaq qorxaqların işidir. Sizlər də qorxaq olduğunuza görə belə çirkin əməllərə əl atırsınız”.

Xatırladaq ki, 1997-ci ildən Türkiyədə yaşayan və sahibkarlıqla məşğul olan Azər Əsgərov mülkünü AXCP-yə kirayə vermişdi. Bir neçə aydan sonra baş verən məlum partlayış nəticəsində mülk sökülüb, sahibinə isə bu günə qədər heç bir kompensasiya ödənilməyib.