Rabitə və Yüksək Texnologiyalar Nazirliyinin Aparat rəhbəri olmuş Vidadi Zeynalovun həbsxanadan çıxdıqdan sonra restoran biznesinə başlaması ilə bağlı yayılan xəbərlər hazırda medianın əsas gündəm mövzusudur.
Axar.az xəbər verir ki, restoran biznesi ilə bağlı suallara “acından ölən deyiləm ki!” cavabını verən V.Zeynalovun çoxmilyonluq biznesə sahib olduğu deyilir.
Xatırladaq ki, 2015-ci ildə “Rabitə işi” çərçivəsində həbs olunmuş və Bakı Ağır Cinayətlər Məhkəməsinin hökmü ilə 13 il müddətinə azadlıqdan məhrum edilmiş V.Zeynalovun əmlakına həbs qoyulmuşdu. Həmin vaxt onun üzərinə həbs qoyulmuş əmlakının sayı 67 idi. Bu əmlakların ümumi dəyəri 43 milyon 489 min 537 manat təşkil edirdi.
Lakin 2017-ci ildə keçirilən növbəti məhkəmədə Vidadi Zeylanovun 2009-cu ilə qədər əldə olunan əmlaklarının üzərindən həbs götürüldü, həbs cəzası 4 isə endirildi.
Məlumata görə, həmin vaxt Bakı Apellyasiya Məhkəməsinin qərarına əsasən, Vidadi Zeynalovun oğlu Pərviz Zeynalovun adına olan Bakı şəhəri, Xətai rayonu, Telnov küçəsində olan mənzil, Vidadi Zeynalovun bacısı Əminə Seyidovaya məxsus Nobel prospektində olan mənzil, qohumu Fuad Kərimova məxsus Bakı şəhərində olan iki mənzil, qohumu Bəxtiyar Nuriyevin adına olan Bakıda yerləşən 6 mənzil, bacısı Kəmaləyə məxsus bir mənzil, Vidadi Zeynalovun adına Səbail rayonunda olan üç mənzil, qızı Lalə Zeynalovaya məxsus 4 mənzil, bacısı Əminəyə məxsus bir mənzil və bir qeyri-yaşayış sahəsi, bacıları Kəmalə və Əminəyə məxsus daha bir neçə mənzil, oğlu Pərvizə məxsus İsmayıllıda yerləşən torpaq sahələri, qohumu Günel Hüseynlinin adına olan Xırdalanda yerləşən torpaq sahəsi və digər bir neçə əmlakı üzərindən həbs götürüldü.
Bu qədər əmlaka sahib olmasına rəğmən, “acından öləsi deyiləm ki” deyən Vidadi Zeynalovla bağlı daha bir sensasion fakt üzə çıxıb. “Yeni Müsavat” qəzeti Vidadi Zeynalovun oğlu Pərviz Zeynalovun və kürəkəni Nəriman Muradovun İstanbulun Şişli bölgəsində şərikli inşaat şirkəti olduğunu açıqlayıb. Məlumata görə, şirkətin adı “PLZ Star Eğitim İnşaat Gıda Sanayi ve Dış Ticaret Limited”dir.
Şirkətin baş hərflərinin (PLZ) V.Zeynalovun övladları Pərviz, Lalə və Zeynalın baş hərflərindən ibarət olduğu bildirilir.
Qeyd edək ki, Bakı Apellyasiya Məhkəməsi tərəfindən cəzası azaldılan Vidadi Zeynalov bu ilin martında azadlığa buraxılıb.
O, hazırda yüksək qiyməti ilə seçilən və elit istirahət mərkəzlərindən sayılan şamaxıdakı “Məlhəm” restoranını özünün işlətdiyini, hətta “acından ölməmək üçün” taxıl da əkdiyini bildirib. Ehtimal ki, İsmayıllıda yerləşən torpaq sahələrinin əkini ilə məşğuldur.
Son şərhlər