“Sentyabr ayının ikinci yarısından etibarən həm orta, həm də ali təhsil müəssisələrində tədrisin başlanması, dəhlizlərdə, auditoriyalarda və digər dərs otaqlarında qapalı şəraitdə müxtəlif yaşlı insanların eyni vaxtda qrup şəklində toplanması yaxın təmaslara səbəb olur”.
Elchi.az xəbər verir ki, bunu APA-nın sorğusuna cavab olaraq Səhiyyə Nazirliyinin mütəxəssis-eksperti, infeksionist Təyyar Eyvazov deyib.
O bildirib ki, belə hallada əsasən hava-damcı vasitəsi ilə ötürülən virus infeksiyaların yayılması üçün əlverişli şərait yaranır:
“Digər tərəfdən artıq payıza doğru havaların soyuması ilə bərabər qeyri-stabil olması, gün ərzində dəfələrlə dəyişilməsi insanların düzgün geyim seçimini çətinləşdirir. Beləliklə, epidemioloji qanunauyğunluqlara müvafiq olaraq payız-qış mövsümündə kəskin respirator virus infeksiyalarının ardıcıl və ya yanaşı olaraq bir neçəsinin mühitdə cərəyan etməsinin hər il şahidi oluruq”.
Təyyar Eyvazov qeyd edib ki, ölkəmizdə son illər Səhiyyə Nazirliyinin dəstəyi ilə əhalinin həssas qruplarının qripə qarşı peyvənd olunması təbliğ olunmaqla yanaşı müvafiq effektiv və təhlükəsiz peyvəndlər gətirilir və vaksinasiyanın insanların müraciətləri əsasında ilkin səhiyyə müəssisələrində ödənişsiz həyata keçirilməsi təmin olunur, hava-damcı infeksiyalarından qorunmaq yolları haqqında əhali arasında müxtəlif səhiyyə qurumlarının mütəxəssisləri tərəfindən əhali arasında geniş sanitar maariflənməsi işləri aparılır.
Son şərhlər