Rusiya Fransa, Almaniya və ABŞ-ı Ukrayna müharibəsi ilə bağlı Kiyevi dəstəkləməkdə günahlandırsa da, son həftələr bütün iddiaların mərkəzində İngiltərə olub. Kreml Londonu ölkədə kəşfiyyat fəaliyyəti aparmaqda və Ukraynanın hava hücumları ilə bağlı Kiyevə kəşfiyyat məlumatı verməkdə ittiham edərək “Üçüncü Dünya Müharibəsi riski var” mesajını verib.
Elchi.az xəbər verir ki, Rusiyada son bir həftədə baş verən hadisələr Moskvanın hədəf siyahısında gözlənilməz bir ölkənin olduğunu ortaya çıxardı. Rusiyadakı diplomatlar, kəşfiyyat orqanları və məhkəmə orqanları kollektiv şəkildə İngiltərəyə hücum etməyə başlayıblar. Kreml Londonu Ukraynadakı İHA hücumlarından tutmuş Gürcüstanda rejim dəyişikliyi cəhdlərinə, Rusiyaya mədəni təsirdən tutmuş sülh masası ətrafında diplomatik mövqelərə qədər hər şeydə ittiham etməyə başlayıb. Rusiyanın Londondakı səfiri Andrey Kelin İngiltərəyə xəbərdarlıq edərək, “Üçüncü Dünya Müharibəsi riskinin olduğunu” açıq şəkildə bildirdi. Moskva-London xəttini gərginləşdirən hadisələrin fonunu təqdim edirik:
DÜNYA MÜHARİBƏSİ TƏHLÜKƏSİ
Son bir həftə ərzində baş verən hadisələr Rusiyanın diqqətini İngiltərənin kəşfiyyat fəaliyyətinə yönəltdiyini ortaya qoydu. Sky News-a danışan Rusiyanın Londondakı səfiri Andrey Kelin Ukraynanın Murmansk, İrkutsk, İvanovo, Ryazan və Amur bölgələrindəki Rusiya hava bazalarına edilən hücumların arxasında Qərb texnologiyası və kəşfiyyat məlumatlarının olduğunu iddia edib. Kelin, “Bu halda məhdud bir qarşıdurma genişlənə bilər. 3-cü Dünya Müharibəsi riski ola bilər. Rusiya İngiltərənin ölkədəki bütün fəaliyyətlərindən xəbərdardır” deyən Londona qarşı açıq müharibə xəbərdarlığı etdi. Səfir həmçinin Böyük Britaniyanın müdafiə nazirinin “Ukraynaya pilotsuz uçuş aparatlarının göndərilməsini 10 dəfə artıracaqları” barədə açıqlamasını “səssiz təsdiq” kimi dəyərləndirib. Kremlə yaxın mənbələrə görə, Rusiya Britaniyanı təkcə siyasi hədəf kimi deyil, həm də birbaşa hərbi hədəf kimi yerləşdirib.
Şayəstə Hüseynova
