“Sosial Tədqiqatlar Mərkəzinin sorğusu göstərir ki, rəyi öyrənilənlərin 80 faizi 2020-ci il 10 noyabr üçtərəfli bəyanatının şərtlərinə əməl edilməzsə, antiterror əməliyyatlarının aparılmasını dəstəkləyir”.
Bu fikirləri Elchi.az-a açıqlamasında millət vəkili Sahib Alıyev deyib.
Parlament üzvünün sözlərinə görə, indiyədək baş verənlərə dönüb baxanda görürük ki, qarşı tərəf ancaq belə addımlar atıldıqda üzərinə götürdüyü öhdəliklərin bir qismini yerinə yetirir. İstisna etmirəm ki, Ermənistan rəhbərliyi gələcəkdə də bu “ənənə”ni davam etdirəcək:
“Təkcə ona görə yox ki, onlar ancaq güc dilini başa düşürlər. Paradoksal görünsə də, avqustun 3-dəkinə bənzər əməliyyatlar Paşinyanla komandasındakılara da əl verir. Çünki Qarabağdakı Rusiya hərbi kontingentinin Azərbaycan ordusunun önünü kəsməməsi(kəsə də bilməz, buna nə mandatları, nə də mandatlarının olmadığını görməzdən gələcək qədər gücləri və həvəsləri var) Ermənistan baş nazirinin əsas rəqiblərinin-Moskvaya bağlı qruplaşmaların əleyhinə işləməklə yanaşı, Kremlin rəsmi İrəvan üzərindəki təsirini zəiflədir. Qərbdəki bəlli çevrələr də məhz Rusiyanın regionda mövqelərinin zəifləməsinə xidmət etdiyini düşündükləri üçündür ki, sözdə Azərbaycanla Ermənistanı tezliklə sülh anlaşması bağlamağa səsləsələr də, əməldə onu tormozlayan “səhv”lərə yol veirirlər.
Bax, bu reallığa dayanaraq demək olar ki, Qarabağda gələcəkdə yeni antiterror əməliyyatlarının aparılması ehtimalı da elə hardasa 80 faizdir. Və bu reallığa dayanaraq onu da demək olar ki, proseslər belə getsə, Rusiya gələcəkdə Qafqazdakı əsas dayaq nöqtəsi kimi Qərbi Zəngəzuru seçməyə üstünlük verəcək. Təbii ki, bunun üçün də Zəngəzur dəhlizinin üçtərəfli bəyanatda göstərildiyi kimi eksterritoriallığına, onun da üzərində kontrolun ancaq və ancaq özünün əlində olmasına çalışacaq”.
Yeganə