İki ölkə arasında bağlanan saziş ölkəmizdə ciddi narahatlıqla qarşılanıb; Qabil Hüseynli: “Ermənistan silaha pul xərcləmir”
Rusiya Ermənistan ordusunun silahlandırılması ilə bağlı maliyyə vəsaiti ayırıb. Bu barədə düşmən ölkənin mətbuatı da yazıb. Xəbərə görə, qərar Ermənistan prezidenti Serj Sərkisyanın iqtisadi məsələlər üzrə Ermənistan-Rusiya Hökumətlərarası Komissiyanın Rusiyadan olan üzvləri ilə görüşü zamanı verilib.
Bildirilir ki, Rusiyanın Ermənistana güzəştli şərtlərlə 200 milyon dollar ixracat krediti ayırmasına dair saziş imzalanıb.
Düşmən ölkəyə yüksək məbləğdə yardım edilməsi heç şübhəsiz ki, ölkəmizdə ciddi narahatlıqla qarşılanıb. Bağlanan sazişin hazırda Qərbə yox, daha çox Rusiyaya yönəlik siyasət yürüdən Azərbaycanla şimal qonşumuz arasında münasibətlərin gərginləşəcəyinə səbəb olacağı barədə mülahizələr var.
Politoloq Qabil Hüseynli hesab edir ki, hər iki ölkə arasında bağlanan sazişdə siyasi məqsədlər var:“Həyəcanın arxasında Rusiya şirkəti yaranır. Elektrik enerjisini qaldıran da Rusiyadır. Vəziyyət elə yaranıb ki, qaldırılan tarifi aşağı endirmək mümkün olmur. Verilən 200 milyondan Ermənistan köhnə borcları silmək üçün istifadə edir. Buradan əhaliyə, əhalinin maddi-rifah halının yaxşılaşdırılmasına heç nə qalmayıb. Özü də kredit indi yox, çoxdan verilib. Sarkisyan artıq 200 milyonu xərcləyib. Olsaydı, elektrik enerjisinin qiymətini aşağı endirərdi. Bəzi məlumatlara görə, Ermənistandakı hadisələri qızışdıran, əhalinin ayağa qalxmasına səbəb olan qərar Rusiyanın yuxarı elitasında verilib. Bundan əlavə, ayağa qalxan əhalini sakitləşdirmək, müəyyən çərçivəyə salmaq üçün Rusiya tərəfindən heç bir cəhd edilmir. Üstəlik, Rusiya Sərkisyanı müdafiə etmək istəmir, yaxud hələ ki belə bir qərara gəlməyib. Ona görə də əhali belə qərarlı və qətiyyətli görünür.
Onsuz da Rusiyanın hərəkətlərini başa düşmək çox çətindir. Ermənistanda hakimiyyət komandasından qopmalar var. Bu, üsyançıları müdafiə edənlərə baxanda açıq-aşkar görünür. Fikrimcə, hadisələr Qarabağ klanının devrilməsinə doğru gedir. Mənə elə gəlir ki, Qarabağ münaqişəsinin həlli üçün şərait yetişəndə, yaşıl işıq yananda Ermənistanda hadisələr qarışdırılır. Ermənistanda vəziyyətin qarışması Rusiyanın Qarabağ problemini həll etmək iradəsini zəiflədə bilər. Bir sözlə, problemlərin həllinin uzanmasına səbəb ola bilər. Əsas olan budur”.
Qabil Hüseynli Rusiyanın Ermənistana silahı pulsuz verdiyini də qeyd etdi: “Ermənistan silaha pul xərcləmir. Çünki Rusiya pulsuz verir. Ermənistan Rusiyadan silahı həmişə kredit adı ilə götürür, sonra da götürdüyünü qaytarmır”.
Politoloq onu da bildirdi ki, bu saziş Azərbaycan-Rusiya münasibətlərinə təsir etməyəcək: “Rusiya deyə bilər ki, silah satıram, başqa istiqamətlərdə də sənə kömək edirəm. Yəni tarazlığı gözləyirəm. Açığı, bu məsələni heç Rusiyanın qarşısında qaldırmarıq. Şübhəsiz ki, bizim üçün heç də yaxşı hal deyil. Çünki Ermənistanı xilas edən amildir. Ona görə də bu məsələlər ətrafında siyasi polemika aparmaq olmur”.
Son şərhlər