Rusiya cümə günü səhər Kiyevə genişmiqyaslı hücuma keçdi və şəhərin bir çox yerində yanğınlara və dağıntılara səbəb oldu. Kiyev meri Vitali Kliçko hücumda ən azı 11 nəfərin yaralandığını, beşinin xəstəxanaya yerləşdirildiyini açıqladı. Yaralılar arasında hamilə qadın və ağır vəziyyətdə olan bir kişi var.
Elchi.az xəbər verir ki, hücumlar davam etdikcə, hakimiyyət orqanları sakinləri hava hücumu xəbərdarlığı ləğv edilənə qədər sığınacaqlarda qalmağa çağırdı. Şəhər hökuməti elektrik və su kəsintilərinin mümkün olduğu barədə xəbərdarlıq etdi.
Yaşayış binaları hədəfə alındı
Sosial mediada paylaşılan görüntülərdə alovlar, damlardan qalxan tüstü və çoxsaylı ərazilərdə dağıntılarla örtülü küçələrdə sığınan mülki şəxslər görünürdü.
“Ruslar yaşayış binalarını vurur. Demək olar ki, bütün rayonlarda çoxmərtəbəli binalara ciddi ziyan dəyib”, Kiyev Hərbi Administrasiyasının rəisi Timur Tkaçenko Telegram-da bildirib.
Tkaçenko hücumda həm dronlardan, həm də raketlərdən istifadə edildiyini və şəhərin müxtəlif yerlərinə axtarış-xilasetmə qruplarının göndərildiyini qeyd edib. Mer Kliçko bir rayonda istilik sisteminin zədələndiyini və xidmətin dayandırıldığını bildirib.
Şayəstə
