Azərbaycanın ABŞ-dakı səfirliyi Vaşinqtonda “28 May – Respublika Günü” və eləcə də qarşıdan gələn Azərbaycan Silahlı Qüvvələr günü münasibəti ilə təntənəli ziyafət təşkil edib.Səfirlikdən APA-ya verilən məlumata görə, ziyafətə ABŞ Administrasiyasının məsul rəsmiləri, ABŞ hərbi qüvvələrinin yüksək rütbəli zabitləri, müxtəlif dövlət və ictimai qurumların çoxsaylı nümayəndələri, diplomatik korpus, akademik dairələr və yerli ictimaiyyətin təmsilçiləri və nəhayət, azərbaycanlı, türk və yəhudi icmalarının üzvləri daxil olmaqla, minə yaxın qonaq qatılıb.
Azərbaycanın ABŞ-dakı səfiri Elin Süleymanov müsəlman Şərqində ilk demokratik parlament respublikasının 97 il əvvəl məhz Azərbaycanda qurulduğunu xatırladıb. Səfir müxtəlif mədəniyyət və dinlərin bir məkanda qovuşduğu Azərbaycanın öz müxtəlifliyi ilə dünyanın üzləşməkdə olduğu radikalizm meylərinə ən tutarlı cavab verdiyini vurğulayıb. Bu mənada, o, qarşıdan gələn həftələrdə ilk Avropa Oyunlarına ev sahibliyi edəcək Azərbaycanda artıq 2017-ci ildə İslam Həmrəyliyi Oyunlarının təşkil olunacağının təsadüfi xarakter daşımadığını söyləyib. Elin Süleymanov müxtəlif təhdidlərlə üzləşməkdə olan Azərbaycan xalqının öz müstəqilliyinə möhkəm şəkildə bağlı olduğunu bildirib.
ABŞ Milli Qvardiya Bürosunun rəhbərinin müavini general leytenant Cozef Lenqyel Azərbaycanın ötən 15 ərzində Əfqanıstan başda müxtəlif bölgələrdə aparılan əməliyyatlara verdiyi dəstəyə görə təşəkkür edib, Azərbaycanın Əfqanıstanla nəqliyyatı təmin edən Şimal Paylaşdırıcı Şəbəkəsində iştirakını yüksək qiymətləndirib.
ABŞ-ın ATƏT-in Minsk Qrupundakı həmsədri, səfir Ceyms Uorlik çıxış edərək, ölkəmizə dəfələrlə etdiyi səyahətlər boyu xalqımızın özünəməxsus mədəniyyəti və insanların isti münasibəti və qonaqpərvərliyi ilə tanış olduğunu söyləyib. Əlavə edib ki, son iyirmi ildə Dağlıq Qarabağ münaqişəsinin Azərbaycana və regiona vurduğu zərərin şahidi olub. Amerikalı səfir həmçinin ABŞ və Azərbaycan arasında qarşılıqlı dəyər və məqsədlərə dayanan ikitərəfli münasibətlərin inkişafını diqqətə çatdırıb.
Çıxışlardan sonra ziyafət verilib.
Son şərhlər