Bu gün Bakı Apellyasiya Məhkəməsində jurnalist Rauf Mirqədirovun apellyasiya şikayəti üzrə məhkəmə başa çatıb.
“Report”un məlumatına görə, hakim Abid Abdinbəyovun sədrliyi ilə keçirilən prosesdə qərar elan olunub.
Qərara əsasən, jurnalistə 5 il şərti həbs cəzası verilib.
Qərarın elan edilməsindən sonra o, məhkəmə zalında azadlığa buraxılıb.
Qeyd edək ki, R.Mirqədirov 2014-cü ilin aprel ayında Türkiyədə saxlanılıb. Jurnalist daha sonra Azərbaycana deportasiya olunub. O, Cinayət Məcəlləsinin 274-cü (dövlətə xəyanət) maddəsi ilə ittiham olunub.
Bakı Ağır Cinayətlər Məhkəməsinin hökmü ilə R.Mirqədirov 6 il müddətinə azadlıqdan məhrum edilib. O, həmin hökmdən apellyasiya şikayəti ilə Bakı Apellyasiya Məhkəməsinə müraciət edib.
Musavat.com-un reportyoru bu xoş xəbərə Rauf Mirqədirovun anasının münasibətini soruşub. O, çox sevindiyini bildirərək əlavə edib ki, hazırda Rauf qəbiristana, ötən il vəfat etmiş atasının məzarını ziyarət etməyə gedib, oradan isə evə gələcək.
Əməkdaşımızın verdiyi məlumata görə, Rauf Mirqədirov atasının məzarını ziyarət etdikdən sonra yaşadığı evə gəlib.
Musavat.com Rauf Mirqədirovun yaşadığı binanın önündə qarşılanmasıyla bağlı fotoları təqdim edir.
Jurnalistlər həbsdən azad olunmuş Rauf Mirqədirovla
Son şərhlər