Dövlət İmtahan Mərkəzi (DİM) mayın 12-də I və IV ixtisas qruplarının abituriyentləri üçün keçirdiyi qəbul imtahanlarının nəticələrini elan edib.
İmtahanda I ixtisas qrupu üzrə 1 abituriyent – Sumqayıt şəhərindəki Texniki və təbiət elmləri liseyinin məzunu ona təqdim olunmuş bütün test tapşırıqlarına düzgün cavab verib və maksimal nəticə – 400 bal toplayıb.
Modern.az 400 bal toplayan Tofiq Muxtasanovla əlaqə saxlayıb. Abiturient yüksək bal toplayacağına inandığını deyib:
“Buraxılış imtahanında 265 bal toplamışam. Bu il iki dəfə sınaq imtahanı oldu, birincidən 310 bal, digərindən 372 bal toplamışdım. Əvvəlki illərlə müqayisədə Fizikada nəzəriyyəyə çox önəm verilmişdi. Həmin sualları cavablandırmaq üçün mövzunu dərindən bilmək lazımdır. Tutaq ki, hansısa abituriyent müəyyən qaydaları əzbərləmişdisə, artıq həmin sualları yaza bilməyəcəkdi. Yəqin ki, müəyyən çaşdırıcı suallar olduğuna görə 400 bal toplayan tək mən oldum. Mənə görə suallar çox da çətin deyildi”.
Tofiq Muxtasanov deyib ki, Bakı Ali Neft Məktəbində təhsil almaq istəyir.
“Bakı Ali Neft Məktəbində İnformasiya təhlükəsizliyi ixtisasını seçmək istəyirdim, ola bilsin Neft-Qaz və kimyanı da seçim. Hələ tam qərar verməmişəm, fikirləşirəm”.
Son şərhlər