Birləşmiş Millətlər Təşkilatının (BMT) baş katibi Antonio Quterreş inkişaf etmiş ölkələrdən iqlim dəyişikliyi ilə mübarizədə digər ölkələrə hər il 100 milyard dollar ayırmaq öhdəliyini yerinə yetirmələrini xahiş edib.
Elchi.az xəbər verir ki, Quterreş bu barədə Qətərin paytaxtı Dohada keçirilən BMT-nin Ən Az İnkişaf etmiş Ölkələr üzrə 5-ci Konfransının açılışında çıxış edib.
İqlim fəlakətlərindən ölən 10 nəfərdən 7-nin ən az inkişaf etmiş ölkələrdə meydana gəldiyini vurğulayan Quterreş bildirib:
“İnkişaf etmiş ölkələr iqlim dəyişikliyinə uyğunlaşa bilmələri və müqavimət göstərə bilmələri üçün ən az inkişaf etmiş ölkələrə dəstəyini gücləndirməlidirlər”.
Bu kontekstdə Quterreş inkişaf etmiş ölkələri hər il 100 milyard dollar toplamaq öhdəliyini yerinə yetirməyə çağırıb.
BMT-nin baş katibi çıxışından sonra “Twitter” hesabında qeyd edib:
“Hökumətlər, və vətəndaş cəmiyyəti böhranın önündə olanlara iqlim ədalətini çatdırmalıdır. Yalan vədlər dövrü bitməlidir”.
İnkişaf etmiş ölkələr 2009-cu ildən 2020-ci ilə qədər inkişaf etməkdə olan və ya az inkişaf etmiş ölkələrin iqlim dəyişikliyinə qarşı mübarizəsini dəstəkləmək üçün hər il 100 milyard dollar maliyyələşdirməyi öhdələrinə götürüblər. Bununla belə, vəd edilən iqlim maliyyəsi indiyədək istənilən səviyyədə həyata keçirilməyib.
Qətərdə keçirilən BMT-nin Ən Az İnkişaf etmiş Ölkələr üzrə Beşinci Konfransı martın 9-dək davam edəcək.
Konfransda dövlət və hökumət başçıları, nazirlər, diplomatlar, yüksək vəzifəli şəxslər, iş adamları, regional və qlobal təşkilatların, qurumların və şirkətlərin nümayəndələri də daxil olmaqla 6 minə yaxın insanın iştirakı gözlənilir.
Yeganə