Birləşmiş Millətlər Təşkilatının Baş katibi Antonio Quterreş səlahiyyət müddəti ərzində ilk dəfə olaraq səlahiyyətlərindən istifadə edərək Qəzzada humanitar fəlakətin qarşısını almaq üçün Təhlükəsizlik Şurasına məktub göndərib.
Elchi.az xəbər verir ki, Birləşmiş Millətlər Təşkilatının (BMT) Baş katibi Antonio Quterres ixtiyarında olan ən güclü diplomatik vasitə hesab edilən vasitəyə əl atıb.
Baş katibin sözçüsü Stefan Düjarrik gündəlik mətbuat konfransında sözügedən məktubu paylaşıb.
Baş katib Quterreş məktubda BMT Nizamnaməsinin 99-cu maddəsinə istinad edərək, “8 həftədən çox davam edən İsrail-Həmas düşmənçiliyinin dəhşətli insan iztirablarına səbəb olduğunu” bildirib.
Quterreş İsrailin hərbi əməliyyatları səbəbiylə Qəzzada mülki əhalinin böyük təhlükə altında olduğunu, mülki insanları qorumaq üçün təhlükəsiz yer olmadığını, səhiyyə sisteminin də çökdüyünü vurğulayıb.
Qəzzada mövcud vəziyyətin əhəmiyyətli humanitar əməliyyatların aparılmasını qeyri-mümkün etdiyini vurğulayan Quterreş Qəzzanın İsrail müdafiə qüvvələrinin davamlı bombardmanları altında olduğunu bildirib.
Birləşmiş Millətlər Təşkilatının Nizamnaməsinin 99-cu maddəsi BMT Baş katibinə beynəlxalq sülhün və təhlükəsizliyin qorunmasına təhdid hesab etdiyi istənilən məsələni Təhlükəsizlik Şurasının üzvlərinin diqqətinə çatdırmaq səlahiyyətini verir.
Nuranə Məmmədova