Bütöv Azərbaycan Xalq Cəbhəsi Partiyasının sədri, millət vəkili Qüdrət Həsənquliyev xalqcebhesi.az saytına musahibə verib.
Elchi.az sözügedən müsahibəni oxuculara təqdim edir:
– Qüdrət bəy, İlham Əliyevin alternativsiz seçkilərə getməsi barədə deyənlərə münasibətinizi bilmək istərdik?
– Bu fikrləri həm İlham Əliyevdən dəstək istəyənlər səsləndirir, həm də seçkini gözdən salıb ölkənin beynəlxalq imicini korlamaq, seçkinin legitimliyini şübhə altına almaq istəyənlər. Vaxtilə özünü müxalifət, ölkənin gələcəyini düşünüən “böyük siyasətçilər” kimi xalqımıza sırımağa cəhd etmiş adamlar da bəlli səbəbdən seçkiyə qatıla bilmədikləri üçün deyirlər ki, İlham Əliyevə səs verəcəklər. Başqa vaxt br çox problemlərin müxalifətin zəifliyindən qaynaqladığın söyləyirlər. Gözəl başa düşürlər ki, İlham Əliyevin onların dəstəyinə ehtiyacı yoxdur. Təsəvvür edək ki, İlham Əliyev bu seçkilərdə 99,99% səs alır. Seçkidən sonra onun qəbul etdiyi hansı qərara etiraz edəcəksən? Bu xalq və ölkə haqqında dünya nə fikirləşəcək?Onsuz da Azərbaycanda BMT nəzarətində dünyanın ən ideal, ədalətli seçkiləri keçirilsə belə fəaliyyətdə olan istənilən prezidenti udmaq müşkül məsələdir, o ki, qalmışdı işğala son qoymuş Ali Baş Komandanı. Diqqət yetirmisinizsə, hər hansı məclisə varlı bir insan gəlir, çoxlu adam onunla eyni imkanlara malik, eyni taleni bölüşən birisi ilə yox, həmin şəxsin yanında oturmaq istəyir. Bilə-bilə ki, həmin adam ona bir manat da verməyəcək. Yaxud insanları incidən yaramaz bir məmur olsun. Bu xalqın inkişaf səviyyəsinə, gen yaddaşına bağlı məsələdir. Mentaliteti dəyişmək üçün uzun zamana ehtiyac var. Ona görə siyasi baxımdan hazırlıqlı seçicilər qutu başına gələndə ölkəmizdə köklü dəyişikliklərə yol açacaq ciddi islahatlar aparacağına, seçkilərdən sonra konkret hansı müddətə nəyi dəyişəcəyini vəd edən namizədlərə səs vermək barədə düşünməlidir. Bu günə qədər namizədliyini irəli sürmüş şəxslərin hər biri layiqli rəqibdir, ölkəmizi təmsil etməyə qadirdirlər. Seçkilərin də siyasi etikanın gözlənilməsi ilə rəqabət şəraitində keçəcəyinə inanıram.
– Sizləri ən çox ona görə ittiham edirlər ki, 44 günlük savaş və 19 sentyabr antiterror tədbirlərindən zamanı Prezidenti xeyli tərifləmisiniz, onun daxili və xarici siyasətini bəyəndiyinizi elan etmisiniz, amma indi ona alternativ olaraq seçkiyə qatılırsınız.
– Bunların xəstə məntiqi ilə müxalifətsənsə hər şeyi pisləməli, iqtidarı düşmən elan etməlisən. Biz dövlət müstəqilliyini bərpa etmişdik, işğala son qoyub dövlət suverenliyini Qarabağda bərpa edəndən sonra partiyamızın adında qarşıdurma kimi assosiasiya oluna biləcək “cəbhə” sözü olduğu üçün partiyanın adının dəyişdirilməsi, yeni çağırışlara uyğun səslənən “Ədalət, Hüquq, Demokratiya”, qısa ƏHD adlandırılması barədə İdarə Heyətində qərar qəbul etdik.
İlham Əliyevin liderliyi ilə 44 günlük savaşda xalqımız erməni faşizmi üzərində misilsiz bir qələbəyə imza atıb.:Bəyənatlar qələbə ilə bağlı prezidentin atdığı addımlarla bağlı olub. Mən parlamentdə onun adının əbədiləşdirilməsi barədə qanun qəbul edilməsini təklif etmişdim. Xalq mənə etimad göstərərsə seçkilərdən dərhal sonra parlamentə ilk göndərəcəyim qanun layihələrindən biri bu barədə, digəri Xankəndi üzərundə dövlət suverenliyinin bərpası ilə əlaqədar böyük amnistiya aktı haqqında qərar layihəsi olacaq. Çoxları hələ də tam dərk edə bilmir ki, biz nəyə nail olmuşuq. Çünki böyük uğuru az itkilərlə və qısa müddətə əldə etmişik. İlham Əliyev Azərbaycan tarixinin ən şanlı səhifələrindən birini yazıb. Biz inqilabçı partiya deyilik, təkamül yolu ilə inkişafın tərəfdarıyıq, keçmişə həmişə hörmətlə yanaşacağıq. Amma mənim fəaliyyətimi izləyənlər bilir ki, BAXCP yarandığı gündən dövlət hakimiyyətinin formalaşdırılması və idarə olunmasının fərqli modelini təklif edir. Biz Azərbaycan Xalq Cümhuriyyətinin varisiyik və ölkəmizin sürətli inkişafı üçün dövlət idarəetməsində gələcəyimizi parlamentli respublika modelinin tətbiqində görürük. Konstitusiya islahatlarına gediləcək, dövlətin adı Şimali Azərbaycan Cümhiriyyəti adlanacaq, müxlifətin rolu ,parlamentdə fraksiyaların təmin edilməsi, Ali Məclisin yeni yaradılacaq “hüquq, müdafiə və təhlükəsizlik komitəsi”ndə böyük ictimai rezonanas doğuran cinayət xarakterli məsələlərlə bağlı istintaq aparılması konstitusiyada öz əksini tapacaqdır. Məmurların sayını azaltmaq və yerli rəhbərlərin əhali qarşısında hesabatlılığını təmin etmək üçün ölkə 15 inzibati ərazi vahidinə-regiona bölünəcək, regionların yerli sakinlər tərəfindən seçilən 31 nəfərdən ibarət məclisləri olacaq və regon rəhbərləri həmin məclisdə seçiləcək. Demokratiyanı dünyaya yaymış bütün Qərbi Avropa ölkələri bu modeldən istifadə edərək böyük uğurlara imza atıb, inkişafa nail olub. Biz qanunun aliliyini təmin edəcək, insan haqlarını qoruyacaq, mülkiyyətə təminat verəcək güclü və ədalətli məhkəmə hakimiyyəti üçün məhkəmələrdə andlı iclasçılar institutunu tətbiq edəcəyik. Məhkəmədə çəkişən tərəflərdən kimin haqlı olmasını hakim yox, xalqın arasından seçiləcək 12 nəfər sadə vətəndaş (andlı iclasçılar ) müəyyən edəcək. Ədliyyə Naziri və Baş Prokuror vəzifələri birləşdiriləcək,vahid “dövlət istintaq komitəsi” formalaşdırırlacaq. Biz dövlətin nəzarətində olan iqtisadiyyatın əsas sahələrini, universitetləri, səhiyyə müəssiələrini özəlləşdirəcək, iqtisadiyyatda rəqabət mühiti yaradacaq, inhisarçılığa son qoyacağıq. Yaxın qonşularla sıx əməkdaşlıq siyasəti apararaq Dünya Ticarət Təşkilatına, regional iqtisadi birliklərə qoşulacağıq. Dövlət Neft Fondunun vəsaitlərinin əhəmiyyətli hissəsini yerli banklarda yerləşdirəcəyik ki,sahibkarların ucuz kreditlərə çıxışı olsun. Sərhədləri açacaq, ölkəni xarici investisiyalar üçün cəlbedici edəcəyik. Böyük sosial islahatlar həyata keçiriləcək, orta yaşın 73 olduğunu nəzərə alıb qadınlar üçün pensiya yaşı 59-a, kişilər üçün 61-ə endiriləcək. Pensiyaların minimum həddi orta aylıq əmək haqqının 80%-dən az olmayacaq. Uşaqlara `uşaq pulu` deyilən aylıq müavinətlər veriləcək. Müqavilə əsasında peşəkar ordu qurulacaq,çağırış yaşına çatmış oğlanlar ya orduya hərbi xidmət keçmədiyi üçün pul ödəyəcək,ya da 6 ay hərbi xidmət keçəcək. Peşəkar hərbçilər məcburi 20 il xidmət keçəcəkdir. Büdcədən maliyyələşən şəxslərin əmək haqqı əhəmiyyətli məbləğdə artırılacaq, çünki aparılacaq islahatlar nəticəsində büdcə gəlirləri dəfələrlə artacaq. Təhlükəsizlik sahəsində Türkiyə, Rusiya, Pakistan və İsrail ilə yaxından əməkdaşlıq edəcək ,türk dövlətləri ilə yaxınlaşma siyasəti davam etdiriləcək. Bu bizim seçki platformamızdan kiçik tezislərdir. Kim deyirsə ki, seçki alternativsiz olacaq, ciddi şəkildə yanılır, kimin nə danışmasından asılı olmayaraq, biz qələbə uğrunda mübarizə aparacağıq.
– Bu gün Respublika Həmkarlar İttifaqları Konfederasiyası İlham Əliyevin prezidentliyə namizədliyinin müdafiəsi ilə bağlı qərar qəbul edib. Bu qərara münasibətiniz necədir?
– Həmkarlar İttifaqları haqqında qanunun birinci maddəsinə görə, həmkarlar ittifaqları qeyri-siyasi təşkilatlardır. Bu baxımdan, belə bir qərarın qəbul olunması qanuna ziddir və qəbuledilməzdir.
Son şərhlər