Hindistan və ABŞ arasında ikitərəfli ticarət sazişinin birinci hissəsi yaxın vaxtlarda imzalanacaq.
Elchi.az xəbər verir ki, bu barədə keçirdiyi mətbuat konfransında Hindistanın ticarət və sənaye naziri Piyuş Qoyal bəyan edib.
“Hər iki ölkənin liderləri hələ fevralın 3-də çərçivə sazişi barədə elan etmişdilər. Bütün əsas bəndlər razılaşdırılıb”, — deyə o bildirib. “Tam əminəm ki, biz ABŞ ilə ikitərəfli ticarət sazişinin birinci hissəsini ən qısa müddətdə bağlayacağıq”, — deyə Qoyal əlavə edib.
Nazirin sözlərinə görə, bu saziş çərçivəsində Hindistan və ABŞ arasında gömrük tariflərinin strukturu qəti şəkildə təsdiqlənəcək.
Gözlənildiyinə görə, Hindistan və ABŞ-ın danışıqlar aparan heyətləri iyunun 2-4-də Yeni Dehlidə keçiriləcək məsləhətləşmələrdə ikitərəfli ticarət sazişinin detallarının razılaşdırılmasını yekunlaşdıracaq və ticarət sahəsində münasibətlərin inkişafını nəzərdən keçirəcəklər. Bu danışıqlar raundunda iki ölkənin nümayəndə heyətləri bazarlara çıxış, qeyri-tarif tədbirləri, gömrük və ticarət prosedurlarının sadələşdirilməsi, investisiyaların stimullaşdırılması və iqtisadi təhlükəsizlik sahəsində koordinasiyanın təmin edilməsi kimi istiqamətləri müzakirə edəcəklər.
Məryəm
