Zavallı polis də oxşar aqibəti yaşamağa məhkum edildi…
Moderator.az xəbər verir ki, noyabrın 24-də Qız Qalasından özünü yerə ataraq intihar etmiş şəxsə görə həmin vaxt orada xidmət aparan polis çavuşu polis orqanlarından xaric edilib.
Bildirilir ki, 22 il xidmət etmiş bu zavallı polis nəfərinin təqaüdə çıxmasına bir neçə ay qalıbmış, amma bəxtsizlikdən intihar hadisəsi onun xidməti müddətinə təsadüf etdiyindən o itirdiyi illərinin zəhmətinin bəhrəsini görmədən polis orqanlarına əlvida deməli olub…
Xəbəri eşidən Moderator.az-ın əməkdaşı 28 metrlik Qız Qalasına baş çəkib və orada quraşdırılan 1,4 metrlik şüşə qoruyucuya baxış keçirib. Həmin vaxt Qız Qalasının üstündə ən azı 25-30 adam və cəmisi bir polis nəfəri varmış. Qısaca müşahidədən sonra belə qənaətə gəlmək mümkündür ki, intihar vaxtı orada xidmət aparmış həmin zavallı polisin heç bir günahı olmayıb. Çünki praktik olaraq bir nəfər o sayda insana nəzarət etmək imkanından məhrumdur və məhdudlaşdırıcı şüşə elə səriştəsiz montaj edilib ki, hətta azyaşlı uşaq da bir anın içərisində polisin gözündən yayınaraq özünü aşağı ata bilər…
Odur ki, Moderator.az “İçərişəhər” Dövlət Tarix-Memarlıq İdarəsi rəhbərlərinin diqqətinə çatdırmağı özünə borc bilir ki, həmin şüşə qoruyucular demontaj edilərək yerdən 1 metr hündürlükdə olan daş hasarın üzərindən bərkidilməlidir ki, intihar cəhdində olan şəxsə bunu reallaşdırmaq fiziki cəhətdən mümkünsüz olsun. Əks halda daha neçə-neçə polis nəfəri işini və bəlkə də bu talesizliyə görə hətta həyatını itirəcək…
Son şərhlər