Biləsuvarda Müdafiə Nazirliyinin və rayon icra hakimiyyətinin təşkilatçılığı ilə Dövlət Bayrağı Gününə həsr 
olunan “Qəhrəmanlıq ənənələrini yaşadaq” adlı tədbir keçirilib. AzərTAc xəbər verir ki, tədbir iştirakçıları əvvəlcə ümummilli lider Heydər Əliyevin abidəsi önünə gül dəstələri qoyaraq xatirəsini ehtiramla yad ediblər. Azərbaycanın ərazi bütövlüyü uğrunda canlarından keçən biləsuvarlı şəhidlərin xatirə kompleksi də ziyarət olunub. Şəhid ailələrinin nümayəndələri, Qarabağ müharibəsi veteranları, Çernobıl və Əfqanıstan əlilləri, ictimaiyyətin nümayəndələri, hərbi hissələrin əsgər və zabitləri tədbirdə iştirak ediblər. Toplantıda üçrəngli bayrağımızın tarixi haqqında məlumat verən rayon icra hakimiyyətinin başçısı Mahir Quliyev bayrağın hər bir azərbaycanlının qürur mənbəyi olduğunu vurğulayıb. Bildirilib ki, 1990-cı ildə ümummilli lider Heydər Əliyevin qətiyyəti ilə ay-ulduzlu bayrağımız 70 ildən sonra ilk dəfə yenidən Naxçıvanda qaldırılıb və onu gələcək nəsillərə çatdırmaq hər birimizin müqəddəs borcudur. O, Ulu Öndərin xilaskarlıq missiyası ilə Azərbaycanın müasir inkişaf yoluna çıxdığını diqqətə çatdırıb. Bu gün Ümummilli Liderin siyasətinin Prezident İlham Əliyev tərəfindən davam etdirildiyi vurğulanıb. Tədbirdə digər çıxış edənlər bayrağımızın hər zaman yüksəklərdə, hətta tezliklə Qarabağda və işğal edilmiş digər ərazilərimizdə dalğalanacağına əminliklərini bildiriblər. Sonra Silahlı Qüvvələrin Mahnı və Rəqs Ansamblının müşayiəti ilə hərbiçilər manejə dəvət olunublar. Tədbirdə 120 biləsuvarlı şəhidin portreti canlandırılıb, Milli Qəhrəman Mübariz İbrahimovun qəhrəmanlıq yoluna nəzər salınıb. Təqdim olunan müxtəlif kompozisiyaların əsasını qəhrəmanlıq ənənələrini yaşatmaqla bağlı çağırışlar təşkil edib.
Son şərhlər