Bəhruz Bayramov Kamal Rüstəmovun qətlinin digər iştirakçılarını ifşa etmək istəyir
İki ay öncə keçmiş qaynı Ürfan Rzayev tərəfindən amansızlıqla qətlə yetirilən Kamal Rüstəmovun atası Əli Rüstəmov yenidənModerator.az vasitəsilə baş prokuror Zakir Qaralova şikayət edib. Əli Rüstəmov istintaqın gedişindən narazıdır və israrla bildirir ki, qatil cinayəti təkbaşına deyil, iki nəfər yaxın dostu ilə birlikdə törədib. Amma qatilin atasının biznesmen olması və oğlunun qanını batırmaq üçün külli miqdarda pul xərcləməsinə görə istintaq işi birtərəfli aparır, cinayətin digər iştirakçılarının ifşası istiqamətində heç bir addım atılmır.
Yeri gəlmişkən, Ə. Rüstəmov Moderator.az-a bildirib ki, tanınmış vəkil Bəhruz Bayramov da gələn həftədən onların hüquqlarını qoruyacaq. Biz də Bəhruz Bayramovun özü ilə danışdıq. Bildirdi ki, qətlə yetirilən Kamal Rüstəmov Pərviz Həşimlinin qaynı olduğundan son iki ildə bu ailənin başına gələnlər onu da çox narahat edir və təmənnasız olaraq övlad itirmiş Əli kişiyə ən azından mənəvi dəstək vermək üçün rəsmən onların nümayəndəsi kimi prosesə qoşulacaq. B. Bayramov da bildirdi ki, istintaq nədənsə cinayətin digər iştirakçılarının ifşa olunmasına cəhd etmir:
“Ən azından hadisə baş verən gün mərhum Kamalın kimlərlə telefon əlaqəsində olması, qatil Ürfan Rzayevin kimlərlə əlaqə saxlaması, hadisə baş verən zaman həmin ərazidə daha kimlərin olması, hətta yol kənarında gözləyib guya əvvəlcədən yaralanacağı bəlli olan, yəni özləri tərəfindən yüngül xəsarət yetirilən Ürfanın dostlarının niyə 5 dəqiqədən sonra onu götürüb xəstəxanaya aparması və digər çoxsaylı məqamlara hələ də aydınlıq gətirilməməsi şübhələnməyə əsas verir ki, istintaq işi birtərəfli aparır. Mənim prosesə qoşulmağım təbii ki, Kamalı geri qaytarası deyil, eyni zamanda istintaqın da məsələni sonadək ədalətli aparacağına ümidim çox deyil. Amma istənilən halda bu istiqamətdə lazımi vəsatətlərin verilməsi, məsələnin daim diqqətdə saxlanılması baxımından mən də gələn həftədən bu işlə ciddi məşğul olmaq niyyətindəyəm.”
Son şərhlər