Putin təqaüdçülərin pulundan kəsib, silahlanmaya xərcləyir ⋆ "ELÇİ"

Amerika Birləşmiş Ştatları və Rusiya yenidən “soyuq müharibə” dövrünə qayıdır. Artıq dünya Rusiyanın hərbi

fəaliyyəti haqqında düşünmək zorundadır. ABŞ və Avropa Birliyinin silahlanma yarışına yenidən baş vurmasına ehtiyac yoxdur. Lakin Putin Rusiyanı yenidən silahlandırmaq üçün başladığı işləri də cavabsız qoymaq olmaz.

Qərb mediası bildirir ki, bu məsələlərə xüsusi diqqət ayırmaq gərəkir və daha çevik siyasi gedişlərə ehtiyac var. Moskva və Qərb arasında yeni bir silahlanma yarışı başlayıbmı?

“The Daily Beast”in jurnalisti və hərbi ekspert Bill Svitmen dərc edilmiş məqaləsində yazır: “ABŞ və Rusiya yenidən “soyuq müharibə” üçün hazırlıqlara başlayıb. Yenidən silahlanma gündəmdədir”.

Sentyabrın 17-də Rusiya qırıcılarından olan uzunmənzilli MiG-31 Foxhound Alyaska sahilindən 55 dəniz mili məsafəsindəki bir nöqtədə iki Tu-95MS strateji bombardımançını müşayiət edib. Ancaq onlar uzaqmənzilli, gözəgörünməz döyüş təyyarəsi F-22 “Raptor” (Lockheed Martin tərəfindən istehsal olunub) qarşılaşanda, əks istiqamətə çevrilməli oldular.

Bir sözlə, Rusiya uzunmənzilli aviasiya əməliyyatları ilə nüvə hücumunun məşqini həyata keçirdi və bu məşq xarakterli hücum dünya miqyasında nəzərdə tutulmuşdu, ancaq qarşısı alındı.

Rusiya МиГ-31БМ qırıcı təyyarəsini təkmilləşdirməyə qərar verib. Bu təyyarə hələ “soyuq müharibə” dövründə hərbçilərin istifadəsində idi və onların 2029-ci ilə qədər uçması nəzərdə tutulub. Həmçinin hərbçilərin ixtiyarına təkmilləşdirilmiş strateji bombardmançı Tu-95MSM-lər verilməkdədir.

Jurnalist izahat verərək yazır: “Bu silahlardan birgə istifadə təcavüzkar tərəfə yeni taktiki imkanlar verir. O cümlədən kəşfiyyat-zərbə kompleksi olan MiG-lərin ortada olması müdafiə olunan tərəfin qarşısında yeni vəzifələr qoyur”.

“Ancaq bu kimi planları maliyyələşdirmək o qədər də asan deyil, siyasi baxımdan da bunu əsaslandırmaq gərəkir. Bu istiqamətdə fəaliyyətdə olmuş bir çox müəssisələr demək olar ki, sıradan çıxıb. Mütəxəssislər bu kimi araşdırmalardan uzaqlaşdırılıb. Bütün bunları yenidən biraraya gətirmək asan olmayacaq”, – deyə jurnalist yazır.

“Putini necə durdurmalı” yazısında isə bildirilir ki, Rusiyanın hərbi qüdrətinin gücləndiyi bir vaxta hərəkətə keçmək gərəkir. “Bloomberg View”un hazırladığı yazıda vurğulanır ki, Putin hərbi gücü hesabına Rusiyanın Avropada dominant mövqelərini qoruyub, saxlamağa çalışır.

“Əlbəttə, Rusiya suveren ölkə kimi öz ordusunu təkmilləşdirmək haqqına sahibdir. Ancaq bu da faktdır ki, Rusiya bu sahəyə büdcənin imkanlarından kənara çıxaraq, vəsait ayırır. Bu vəsaitin çoxu təqaüdçülərlə bağlı fondlardan götürülür. Ən pisi isə odur ki, Rusiya hərbi gücündən başqa əraziləri özünə ilhaq etmək üçün istifadə edir. Qonşu ölkələrdə qeyri-stabilliyin yaranmasına təkan verir. Ona görə də, dünya bu çağırışları qulaqardına vura bilməz”, – təhlil yazısında belə deyilir.

“Rusiya faktiki olaraq, Ukraynanın başına silah dirəyərək, bu ölkənin Qərblə münasibətlərini öz xeyrinə dəyişmək istəyir. Ona görə də, Qərbin tətbiq etdiyi sanksiyalar bundan sonra da qüvvədə qalmalıdır. Putin iqtisadi və hərbi sahələrdə qonşularına hücumlardan imtina edənə qədər bu, davam etməlidir. Heç bir ölkə, başqa bir suveren ölkəyə nəyi necə etməyi diqtə etmək haqqına sahib deyil”.

Elbəyi Həsənli,

Sürix