“Avropa Birliyi, ABŞ və NATO məsuliyyətsizdir“
İtaliyanın keçmiş baş naziri Silvio Berliskoni NATO və Avropa Birliyini Rusiyaya münasibətdə məsuliyyətsiz davranmaqda ittiham edib. “ Il Fatto Mondo“ya istinad edən «Газета.Ru» bu barədə xəbər yayıb.
“”Biz iqtisadi böhrandan dolayı acınacaqlı durumdayıq. Bizdə proseslər pisdən daha pisə doğru inkişaf edir. Bütün bunların səbəbini isə Avropa Birliyi, ABŞ və NATO-nun çıxardığı yanlış qərarlarda axtarmaq lazımdır. Mən deyərdim ki, onlar son dərəcə məsuliyyətsiz qərarlar qəbul edirlər. Biz 2002-ci ildə Rusiya ilə bağladığımız müqaviləyə əsasən yarım əsir davam etmiş “Soyuq Müharibə”yə son qoya bildik. Ancaq indi atılan məsuliyyətsiz addımlarla bizim gördüyümüz bu işin nəticəsini heçə endirirlər”, cənab Berliskoni belə deyib.
Onun sözlərinə görə Rusiya Ukraynada yaşayan rusları müdafiəsiz qoya bilməzdi. Rusiyada yaşayan ruslar Ukraynada yaşayan rusları öz qardaşları hesab edir.
Xatırladaq ki, hazırda siyasətdən kənarda qalmış cənab Berliskoni baş nazir olduğu dönəmdə Putinlə xüsusi isti münasibəti olan azsaylı Qərb siyasətçilərindən biri olub. O, istefada olduğu dönəmdə də dəfələrlə Rusiya prezidentinin şəxsi qonağı qismində Moskvada olub. Onların birgə ova getdiyi də bəlli faktlardan biridir.
Elbəyi Həsənli, Sürix
Son şərhlər