Polşanın Kənd Təsərrüfatı və Kənd İnkişafı naziri Kşiştof Telus bildirib ki, Ukrayna taxılı Avropa İttifaqı (Aİ) üçün təhdiddir və ittifaq ölkələrinin bazarlarında sabitliyi pozmağa qadirdir. Elchi.az xəbər verir ki, bu barədə “RAR “agentliyinə müsahibəsində bildirib.
“Biz Ukraynanın kənd təsərrüfatının qonşu ölkələrin, eləcə də bütün Avropanın kənd təsərrüfatı üçün təhlükə yaratdığına daha diqqətli olmalıyıq”, – nazir bildirib.
O, həmçinin əlavə edib ki, Ukrayna taxılına qoyulan embarqonun mümkün ləğvi ilə bağlı qərarı Avropa Parlamentindən Polşa xalqını sevməyən siyasi partiyalar təşviq edir.
Bundan əvvəl Polşanın baş naziri Mateuş Moravetski Ukrayna taxılının idxalına qoyulan qadağanın uzadılması ilə bağlı Avropa Komissiyasına ultimatum verib. Jurnalistlərlə söhbət edən baş nazir qeyd edib ki, Varşava həm özünə, həm yerli fermerlərə, həm də Ukraynaya faydalı olacaq şərtlərə nail olmaq niyyətindədir. Eyni zamanda o vurğulayıb ki, hakimiyyət ilk növbədə fermerlərin rifahının qayğısına qalacaq.
Havar Şəfiyeva
