“Rusiyada yeni səfərbərlik çağırışlarının artdığı və 2 milyon çağırışçının silah altına alınacağı xəbərləri çox təhlükəli tendensiyadan xəbər verir. Bu, bütün ətraf ölkələrin təhlükəsizliyinə ciddi hədələr yaradacaq”.
Bu fikirləri Elchi.az-a açıqlamasında BAXCP sədrinin müşaviri, politoloq Azər Qasımov söyləyib.
“Ukraynada 11 aydır davam edən müharibədə 100 mindən çox əsgər itirən Rusiyanı görünən odur ki, bu, heç də narahat etmir və itkilərin artması Rusiyanın artıq yarı yolda dayanmayacağı, axıra kimi gedəcəyi anlamına gəlir ki, başqa çıxış yolu da yoxdur.
“Axıra kimi gedəcək” anlayışı isə Rusiya üçün bütün planlarının həyata keçməsi, yəni bütün postsovet ölkələrini yenidən işğal etmək planıdır. Verdiyi itkilərin hesabını rus hakimiyyəti ancaq bu yolla verə və buna haqq qazandıra bilər.
İstər Qarabağda, istərsə də Azərbaycan və Ermənistana qarşı göstərdiyi səbr də bununla bağlıdır. Kim buna necə və hansı yolla müqavimət göstərəcək, bu, başqa məsələdir.
Təbii ki, hadisələrin gedişində çox şey ola bilər. İlk növbədə Ukrayna məğlub edilməlidir ki, sonrakı planlar işə düşsün. Əsgər sayının çoxluğu Rusiyanı əlavə cəbhələr açmağa sövq edə bilər. Ona görə işimizi ehtiyatlı tutmalıyıq. Ruslara inam yoxdur. Öz xalqını yüz minlərlə qırğına verən digərlərinə nə edər?”.
Yeganə