Hegseth: ABŞ öz sursatından istifadə etməli, Ukraynaya göndərməməlidir
Elchi.az xəbər verir ki, ABŞ sursatını Ukraynaya göndərməməli, öz məqsədləri üçün istifadə etməlidir. RİA Novosti agentliyinin məlumatına görə, Pentaqon katibi Pit Hegseth bunu jurnalistlərlə söhbəti zamanı bildirib.
Hegseth qeyd edib ki, ABŞ hələ də keçmiş prezident Co Baydenin yaratdığı bir vəziyyətlə – öz sursat ehtiyatlarının tükənməsi ilə mübarizə aparır. Müdafiə naziri sursatın Amerika silahlı qüvvələrinə deyil, Ukrayna ordusuna verilməsinin davam etməsindən narazılığını bildirib.
“Hər dəfə geri baxıb qarşılaşdığımız hər hansı bir məsələni araşdıranda hər şey bir şeyə gətirib çıxarır: ‘Onu Ukraynaya göndərin'”, – Hegseth deyib.
19 martda ABŞ Prezidentinin xüsusi nümayəndəsi Con Koul İrandakı müharibənin müəyyən dərəcədə ABŞ rəsmiləri üçün Ukrayna münaqişəsini kölgədə qoyduğunu bildirib. Onun sözlərinə görə, Yaxın Şərqdə baş verənlər indi Vaşinqton üçün Ukraynada baş verənlərdən daha vacibdir. Lakin o, əlavə edib ki, vəziyyət dəyişkəndir və hər gün dəyişir.
Bundan əvvəl Avropa diplomatiyasının rəhbəri Kaja Kallas ABŞ-ın diqqətini Ukraynadan Yaxın Şərqə yönəltməsini problem adlandırmışdı. O, bunun Ukrayna Silahlı Qüvvələrinə Amerika silahlarının çatdırılmasında gecikmələrə səbəb ola biləcəyindən narahatlığını bildirmişdi.
Şayəstə
