Pakistanın gəlir və maliyyə nazirinin müavini Ayşe Qus Paşa qeyri-qanuni rəqəmsal pul köçürmələrinin qarşısını almaq üçün internetdə mövcud olan kripto pul xidmətlərinin qadağan ediləcəyini bildirib.
Elchi.az xəbər verir ki, Milli mətbuatın xəbərinə görə, Paşa Senatın Daimi Maliyyə Komitəsinin iclasında verdiyi açıqlamada, Çirkli Pulların Yuyulmasına Qarşı Mübarizə üzrə Maliyyə Fəaliyyət İş Qrupunun (FATF) şərtlərinə əsasən, internetdə mövcud kripto pul xidmətlərinin qadağan ediləcəyini bildirib.
Pakistan Mərkəzi Bankı və İnformasiya Texnologiyaları Nazirliyinin kriptovalyutaların qadağan edilməsi üzərində çalışdığını ifadə edən Paşa, “İslamabad heç vaxt kriptovalyutaları leqallaşdırmayacaq” dedi.
FATF-ın kriptovalyutaların leqallaşdırılmaması ilə bağlı tələbinə toxunan Paşa İslamabadın 2022-ci ilin oktyabrında FATF-ın boz siyahısından çıxarıldığını xatırladıb.
Mərkəzi Bankın direktoru Sohail Cavad da kripto pulların virtual pul vahidi olduğunu və bu günə qədər onun 16 min növünün yaradıldığını bildirib və 2,8 trilyon dollarlıq bazarın 1,2 trilyon dollara qədər azaldığını bildirib.
Pakistan Mərkəzi Bankı 2018-ci ilin aprelində kriptovalyuta ticarəti və mədənçiliyini qadağan edib. Lakin bu qadağaya baxmayaraq, kriptovalyutalara tələbat artmaqda davam edirdi.
İqtisadi Əməkdaşlıq və İnkişaf Təşkilatının (OECD) Çirkli Pulların Yuyulmasının Qarşısının Alınması üzrə Maliyyə Fəaliyyət Qrupu (FATF) tərəfindən 2018-ci ilin iyun ayında “boz siyahı”ya salınan Pakistan “terrorçuluğu maliyyə cəhətdən dəstəkləyir” və “çirkli pulların yuyulmasının qarşısını ala bilmir”, 21 oktyabr 2022-ci ildə bu siyahıdan çıxarılıb.
Şayəstə Hüseynova