Martın 9-da Azərbaycan Dillər Universitetində Pakistanın Azərbaycandakı səfirliyinin təşəbbüsü ilə nəşr olunmuş “Pakistan-Azərbaycan” kitabının təqdimatı keçirilib.
Bu barədə ADU-dan Elchi.az-a verilən məlumatda bildirilib.
Məlumata görə, ADU-nun rektoru, akademik Kamal Abdulla universitetdə fəaliyyət göstərən dil və mədəniyyət mərkəzləri haqqında məlumat verib. Universitetdə 20-dən çox ölkənin dil və mədəniyyət mərkəzinin uğurlu işindən danışan Kamal Abdulla qeyd edib ki, Vətən müharibəsində Pakistanın Azərbaycana olan mənəvi dəstəyi bizim üçün çox əhəmiyyətlidir:
“Bu gün tarixi bir hadisənin şahidi oluruq. “Pakistan-Azərbaycan” münasibətlərini özündə əks etdirən kitabın təqdimatıdır. Bu təqdimat dostluğun, qardaşlığın simvoludur. Biz bu dostluğu və qardaşlığı hər zaman hiss etmişik. Zəfər savaşında da dostluğumuz və qardaşlığımız özünü ən yüksək səviyyədə göstərdi. Azərbaycan bayraqları ilə yanaşı şəhərimizdə Pakistan bayraqlarını da görmək olurdu. İndi də bu bayraq hər birimizin qəlbində dalğalanır”.Pakistanın Azərbaycandakı fövqəladə və səlahiyyətli səfiri Bilal Hayee səmimi qarşılanmaya və xoş sözlərə görə minnətdarlığını bildirib. Qeyd olunub ki, “Pakistan-Azərbaycan” kitabı iki dost ölkənin münasibətlərinin inkişafına öz töhfəsini vermiş olacaq. Kitabda ölkələr arasındakı diplomatik, siyasi, iqtisadi, hərbi sahələrdə baş tutmuş görüşlərin və əlaqələr tarixi fotolarla əks olunub.
Daha sonra ADU-nun Pakistan Dil və Mədəniyyət Mərkəzində tələbələrlə görüş keçirilib.
Son şərhlər