“Çox vaxt elə bilirik ki, yazıçı olmaq üçün sözlərlə rəftar etməyi bacarmaq kifayətdir. Lakin mən məzmuna da son dərəcə tələbkar yanaşıram. Cəmiyyətdən yazırsansa, sosial psixologiyadan anlayışın olmalı, tarixi mövzulara toxunursansa, analitik tarixdən, tarix fəlsəfəsindən məlumatın olmalıdır”. Bu sözləri Elchi.az-a açıqlamasında yazıçı Rövşən Abdullaoğlu deyib.
O, həmçinin əlavə edib:”Cinayətdən yazırsansa, cani psixologiyası, cinayətin baş verməsində müxtəlif psixoloji, sosioloji faktorların təsiri barədə araşdırmalar aparmalısan və s. Oxucuya təqdim olunan əsər yazıçının bilgiləri ilə müqayisədə aysberqin görünən tərəfi olmalıdır. Mən bir əsəri yazanda yüzlərlə məqalə, onlarla kitab mütaliə edirəm. Bəzən beş yüz səhifəlik kitabdan bir cümləlik faydalı məlumat əldə edirsən, bəzən yüz səhifəlik kitabçadan sənə lazım olan bir çox sualların cavabını tapırsan. Bunsuz dərin məzmunlu, qalıcı mətn yazmaq mümkün deyil. Yəni yazıçılıq və həm də ictimai fəaliyyətim səbəbindən əksər gənc yazıçıların əsərləri ilə tanış olmağa vaxt ayıra bilmirəm. Bəzən fikrimi öyrənmək üçün öz əsərlərini mənə göndərirlər, imkan daxilində oxuyub rəy bildirir, istiqamət verməyə çalışıram. Gözəl bədii qələmi, istedadı olan gənclər çoxdur. Ümumiyyətlə, bizim cəmiyyətimiz müxtəlif sahələrdə yüksək potensiallı gənclərlə doludur, ancaq bəzən tənbəllik və uzunmüddətli, ali hədəflərin olmaması onların inkişafına mane olur”.
Havar Şəfiyeva
Son şərhlər