Amerikanın OpenAI şirkəti Nvidia-nın son çiplərindən bəzilərindən narazıdır və süni intellekt (Sİ) üçün alternativlər axtarır.
Elchi.az xəbər verir ki, bu barədə “Reuters” agentliyi mənbələrə istinadla məlumat yayıb.
Mənbələrin bildirdiyinə görə, ChatGPT-ni hazırlayan şirkətin strategiya dəyişikliyi süni intellektin konkret nəticə çıxarma mərhələsində istifadə olunan mikroprosessorların artan əhəmiyyəti ilə bağlıdır. Bu mərhələ modelin istifadəçilərin sorğu və müraciətlərinə cavab verdiyi prosesi əhatə edir.
Nəşrdə qeyd olunur ki, OpenAI və digər şirkətlərin Sİ üçün çip bazarında alternativlər axtarması Nvidia-nın süni intellekt sahəsindəki dominant mövqeyi üçün “ciddi sınaq” sayılır və bu addım investisiyalarla bağlı ikitərəfli danışıqlar fonunda atılıb. Nvidia hələ də iri Sİ modellərinin öyrədilməsi üçün çiplər bazarında üstün mövqeyini qoruyur, lakin nəticə çıxarma prosesi artıq “rəqabətin yeni cəbhəsi”nə çevrilib.
Nvidia-nın baş icraçı direktoru Jensen Huang daha əvvəl bildirmişdi ki, rəhbərlik etdiyi Amerika texnologiya şirkəti OpenAI startapının maliyyələşdirilməsində iştirak edəcək məbləği yenidən nəzərdən keçirməyi planlaşdırır. Onun sözlərinə görə, şirkət “mütləq şəkildə maliyyələşmədə iştirak edəcək, çünki bu yaxşı investisiyadır”, lakin Nvidia-nın OpenAI-yə nə qədər vəsait yatıracağı dəqiqləşdirilməyib.
Məryəm
