OpenAI şirkəti mətnlərin tərcüməsi üçün ayrıca onlayn xidmət — ChatGPT Translate platformasını işə salıb. Xidmət 50-dən çox dili dəstəkləyir və Google Translate-ə rəqib kimi təqdim olunur.
Elchi.az xəbər verir ki, bu barədə “The Verge” nəşri məlumat yayıb.
Yeni alət veb-interfeys vasitəsilə əlçatandır və görünüş baxımından Google Translate xidmətini xatırladır: istifadəçilərə orijinal və tərcümə olunmuş mətn üçün iki sahə, həmçinin dillərin seçimi təqdim olunur.
Bununla belə, xidmətlərin funksionallığı fərqlənir. ChatGPT Translate hazırda kompüterlərdə brauzer üzərindən mətn tərcüməsini dəstəkləyir, mobil versiyada isə səsli girişdən istifadə etmək mümkündür. Şəkillərin dəstəkləndiyi bildirilsə də, bu funksiya hələlik aktiv deyil. Google Translate-dən fərqli olaraq, OpenAI-nin xidməti sənədlərin, şəkillərin və ya veb-səhifələrin yüklənməsinə imkan vermir.
ChatGPT Translate-in xüsusiyyətlərindən biri tərcümə üslubunun əlavə parametrlərlə tənzimlənməsidir — məsələn, mətni işgüzar üsluba uyğunlaşdırmaq mümkündür.
Əslində, OpenAI daha əvvəl ChatGPT-də mövcud olan tərcümə funksiyasını ayrıca məhsul kimi ayırıb. Lakin hələlik iOS və Android üçün mobil tətbiqlər buraxılmayıb və yeni xidmətdə hansı süni intellekt modelindən istifadə olunduğu açıqlanmayıb.
Məryəm
