Mayın 31-də Akademik Milli Dram Teatrının səhnəsində “Ölülər” tamaşasının daha bir nümayişi keçirilib. Musavat.com xəbər verir ki, görkəmli dramaturq Cəlil Məmmədquluzadənin “Ölülər” pyesi əsasında hazırlanan eyniadlı tamaşanın bu dəfəki nümayişi də anşlaqla keçib. Tamaşaçılar arasında Mədəniyyət və Turizm Nazirliyinin nümayəndələri, mədəniyyət və incəsənət xadimləri, tanınmış ziyalılar iştirak edib. Xatırladaq ki, adı çəkilən tamaşanın bu günlərdə premyerası keçirilmişdi.
Mədəniyyət və Turizm Nazirliyinin sifarişi ilə hazırlanan “Ölülər” tamaşaçılara yeni, özünəməxsus formada təqdim olunub. Xronometrajı 130 dəqiqə olan səhnə əsəri aktyorların ifasında o dövrün mənəvi əsarəti, fanatizm və cəhaləti böyük cəsarətlə, özünəməxsus çalarlarla açılıb. Belə ki, yaradıcı heyət Cəlil Məmmədquluzadə düşüncələrini yüksək məharətlə ifa edərək XX əsrin əvvəllərində Azərbaycanda baş verən prosesləri, mövhumat və cahilliyin poetik və dramatik lövhələrini dolğun təcəssüm etdirə biliblər.
Qeyd edək ki, tamaşa teatrın direktoru və bədii rəhbəri, xalq Artisti Azər Paşa Nemətin quruluşu əsasında səhnələşdirilib. Səhnə əsərinin rejissorları isə gənc rejissorlar Anar Sadıqov və Əlif Cahangirlidir. Baş rollarda,
Şeyx Nəsrullahı xalq artisti Nurəddin Mehdixanlı, Kefli İsgəndəri isə aktyor Anar Heybətov ifa edib. Tamaşada digər rolları xalq artistləri Laləzar Mustafayeva, Rafiq Əzimov, Hacı İsmayılov, əməkdar artistlər Aslan Şirin, Elşən Cəbrayılov, Əli Nur, Hicran Nəsirova, Sabir Məmmədov, Elxan Quliyev, Məzahir Cəlilov, Kazım Həsənquliyev, Firuz Xudaverdiyev, Mirzə Ağabəyli, Əjdər Həmidov, aktyorlar Elçin Əfəndi, Ramin Şıxəliyev, Vüsal Mustafayev, Canəli Canəliyev, Elnur Qədirov, Rüstəm Rüstəmov, Xədicə Novruzlu, Ləman İmanova, Rada Nəsibova, Adil Dəmirov və başqaları məharətlə canlandıra biliblər.
Tamaşanın musiqisi isə görkəmli bəstəkar Qara Qarayevin “Ölülər” pyesinə yazdığı musiqi əsasında yeni versiyada təqdim olunub.
Qeyd edək ki, tamaşadakı səhnələr tamaşaçı auditoriyası tərəfindən dəfələrlə alqışlanıb, böyük maraqla, həqarətlə qarşılanıb.
Son şərhlər