Somali kəşfiyyatı onun təslim olacağını ehtimal edir
“TheAssociated Press” agentliyinin xəbərində deyilir ki, “əl-Şəbab” terrorçu qrupunun liderlərindən biri şənbə günü mühasirəyə alınıb. Onun başına 3 milyon dollar mükafat qoyulub. Bu barədə Somalinin kəşfiyyat orqanlarındakı mənbə agentliyə məlumat verib.
Zəkəriyyə İsmayıl Əhməd Hersi Gedo regionunda yerli polis tərəfindən mühasirəyə alınıb.
Kəşfiyyat zabiti deyib ki, uzun müddətdir ki, axtarışda olan terrorçu ola bilsin ki, polisə təslim olsun. Çünki onunla təşkilatın digər üzvləri arasında ziddiyyət yaranıb. Belə ki, bu yaxınlarda “əl-Şəbab”ın yüksək vəzifəli yetkililərindən olan Əhməd AbdiGedoane ABŞ-ın həyata keçirdiyi hava zərbəsi nəticəsində öldürüldü. Ondan sonra həmin qrupla Zəkəriyyə İsmayıl Əhməd Hersi arasında münasibətlər pozuldu.
Zəkəriyyə İsmayıl Əhməd Hersi“əl-Şəbab”ın rəhbərliyində olan 8 nəfərdən biridir. ABŞ prezidenti Barak Obama həmin 8 nəfərin hamısına görə 2012-ci ildə 33 milyon dollar mükafat vəd etdi. Konkret olaraq Zəkəriyyə İsmayıla görə 3 milyon dollar mükafat nəzərdə tutulub.
Agentlik qeyd edir ki, Zəkəriyyə İsmayıla görə mükafatın necə veriləcəyi isə bəlli deyil.
Agentlik onu da bildirir ki, 2014-cü ildə “əl-Şəbab”a qarşı uğurlu əməliyyatlar keçirilib. Buna baxmayaraq, bu terror təşkilatı hələ də güclüdür. Somalini və Şərqi Afrikanı təhdid etməkdə davam edir. Qonşu Keniya da onların hədəfindədir.
Agentlik yazır ki, Milad günündə “əl-Şəbab”Moqadişoda yerləşən Afrika Birliyi təşkilatının ofisinə hücum edib və nəticədə 9 nəfər öldürülüb. Terror təşkilatı bildirib ki, bu hücum Əhməd AbdiGedoaneninöldürülməsindən dolayı intiqam aksiyası xarakteri daşıyıb.
Düzdür, “əl-Şəbab” bəyan etmişdi ki, onlar həmin hücum zamanı 14 əsgər öldürüb. Ancaq bir qayda olaraq onlar rəqəmləri şişirtməyi xoşlayır.
“Əl-Şəbab”2007-2011-ci illərdə Moqadişo şəhərinə demək olar ki, nəzarət edirdi. Ancaq Afrika Birliyi Ölkələrinin birləşmiş hərbi kontingenti onları Somali paytaxtından vurub kənara atdı. Eyni zamanda terrorçular Somalinin digər iri şəhərlərindən də qovuldu.
Somali hökuməti son dərəcə zəifdir. Onların varlığı yalnız paytaxt Moqadişoda hiss olunur. Kənarlarda isə başpozuq silahlı dəstlər at oynadır…
Son şərhlər