ABŞ prezidenti Co Bayden Ukraynaya əlavə yardım göstərmək üçün İsrailin Fələstinin radikal HƏMAS hərəkatı ilə müharibəsindən istifadə edir. Elchi.az “Fox News”ə istinadən xəbər verir ki, respublikaçı senator Vens prezidenti bunda ittiham edib.
Vens açıqlamasında İsrail və Ukraynadakı vəziyyətlərin çox fərqli olduğuna inandığını açıq şəkildə ifadə edib. “Ukrayna üçün əlavə maliyyə əldə etmək üçün İsrailə yardımı dayandırmaqdansa, Konqres İsraildəki vəziyyətin müzakirəsi və ona layiq olduğu səsvermə üçün vaxt ayırmalıdır”, – deyə senator bildirib.
O, həmçinin Baydenin İsrail və Ukrayna kimi kritik tərəfdaşları dəstəkləmək üçün “təcili büdcə tələbi” barədə açıqlamasını şərh edib. “Baydenin etdikləri iyrəncdir. O, fəlakətli Ukrayna siyasətini skeptik amerikalılara satmaq üçün İsraildə ölən uşaqlardan istifadə edir. Bunlar müxtəlif ölkələrdir, onların müxtəlif problemləri var və İsraildən siyasi ört-basdır etmək cəhdi təhqirdir”, – respublikaçı bildirib.
Havar Şəfiyeva
