Bir neçə gün öncə iki Kəlbəcər sakini Dilqəm Əsgərov və Şahbaz Quliyevin doğulduqları rayonda
Ermənistan silahlı qüvvələri tərəfindən girov götürülməsi və işgəncələrə məruz qalması böyük rezonans doğurdu.
Lakin ölkə bu şokdan çıxmamış daha dəhşətli bir şok yaşadı. Belə ki, iyulun 31-dən avqustun 1-nə keçən gecə Azərbaycan ordusu erməni silahlı birləşmələrinin hücumuna məruz qalaraq 8 (qeyri-rəsmi mənbələrə əsasən 11) şəhid verdi. Demək olar ki, gündəmin ən çox müzakirə olunan mövzusu da budur və bu dəhşətli olaydan sonra ortaya çox ciddi suallar çıxıb: Azərbaycan ordusu niyə bu qədər itki verdi?
Gəlin öncə hadisələrin baş vermə ardıcıllığına nəzər salaq:
Müdafiə Nazirliyi uzun susqunluqdan sonra verdiyi açıqlamasında qeyd edir ki, 3 gün ərzində gedən döyüşlərdə Azərbaycan Silahlı Qüvvələrinin 8 nəfər hərbi qulluqçusu həlak olub. Amma döyüş bölgəsində yaşayan sakinlərin axar.az-a bildirdiklərinə görə heç bir atışma olmayıb. Maraqlıdır, bəs o zaman əsgərlərimizi hansı şəraitdə şəhid ediblər?
Bir müddət öncə müdafiə naziri Zakir Həsənov xüsusi tapşırıq vermişdi ki, ermənilərin hər hansı bir təxribatının, dinc sakinlərimizi atəşə tutması halının baş verəcəyi təqdirdə bunun əvəzi 5-10 qat artıq çıxılacaq. Amma nəticə heç də nazirin dediyi kimi olmadı. Faktiki ən çox itki verən tərəf bizik və Müdafiə Nazirliyinin hansı cavab tədbirləri görəcəyi isə hələ ki, bəlli deyil. Görünür, sadəcə, bəyanat xatirinə verilən tapşırıqlar hər gün fiaskoya uğrayır. Ən biabırçı hal isə o idi ki, ölən əsgərlərin adlarını müəyyənləşdirə bilmirdilər.
Onu da qeyd edək ki, bu təxribatı xarici qüvvələrin təzyiqi kimi qiymətləndirənlər də var. NATO-Azərbaycan Əməkdaşlıq İnstitutu hesab edir ki, əməliyyatın arxasında Rusiya Hərbi Kəşfiyyatı durur və baş verən hadisələr birbaşa Rusiya ilə bağlıdır. Əgər doğrudan da, bu əməliyyatların arxasında rəsmi Moskva durursa, bəs o zaman niyə Müdafiə Nazirliyində Rusiyameyilli generallar önə çəkilir. Konkret olaraq Şuşanın işğalında birbaşa günahkar hesab olunan general Elbrus Orucovun önəmli posta çəkilməsinə səbəb nə idi? Bəlkə, doğrudan da, ölkənin təhlükəsizliyinin qarantı olan ordu hələ də rusca danışıb rusca düşünən və Azərbaycan dilinə biganə Nəciməddin Sadıkovun əlində acizdir?
Ekspertlər isə hesab edir ki, ötən gün baş verən bu faciə məhz genaralların səhlənkarlığı üzündən baş verib, bütün yaşananlar da məhz kadr probleminin düzgün aparılmaması ilə bağlıdır. Hətta onlar buna görə Müdafiə Nazirliyini ittiham da ediblər. Onların da arqumentləri kifayət qədər əsaslıdır.
Gəlin bir-iki fakta diqqət edək:
Müdafiə Nazirliyi qeyd edir ki, “şiddətli atışmadan sonra erməni bölmələri xeyli itki verərək geri çəkilməyə məcbur edilib?! Maraqlıdır, əgər bu doğrudan da, amansız və xain erməni hücuma keçirdisə, onun verdiyi itkilər ən azından neytral ərazidə qalmalı idi. Və bizim komandanlıq düşmənin hücumunu sübut fakti kimi o erməni əsgərlərinin meyidlərini nümayiş etdirməli və səngərdə oturub düşmənin hücümunun qarşısını alan əsgərlərimizin itkisi bu qədər olmamalıydı. Qeyd edək ki, bu faciənin baş verməsinin tam məsuliyyəti erməni-rus tərəfinin üzərində olsa da, bizim “bir gün də olsun müharibədə olmaya-olmaya, general rütbəsi alan “kabinet sərkərdələri” də yaxalarını kənara çəkməməlidirlər. Bəli, reallıq ortadadır: kəşfiyyat idarəsinə tam təsadüfi adamı təyin edən və ona general rütbəsi verdirən nazirin ortaya qoyduğu “ağır nəticə” də belə olur.
Dünən baş verən olaydan sonra isə utanc gətirən daha bir hadisə yaşandı. Mediada saxtalaşdırılan xəbərlər dövriyyəyə buraxıldı. Daha sonra isə bu xəbərlərin yalan olduğu üzə çıxdı. Belə ki, erməni tərəfinin 51 itki verməsi ilə bağlı yayılan məlumat Eduard Abramyan adlı Twitter istifadəçisinə istinadən yayılsa da hesab saxta çıxdı. Məlum oldu ki, Twitterdə belə bir istifadəçi yoxdur. Sözügedən xəbəri isə nazirin bəyanatlarını bəh-bəhlə yanan ANS kanalının saytı yaymışdı. Əslində, bununla da camaatı çaşdırmaq, erməni tərəfinin 51 itki verməsi ilə öz səhlənkarlıqlarını ört-badır etməyə çalışırdılar. Çünki hər iki olay, həm Kəlbəcər sakinlərinin başına gətirilən oyunlar, həm də bir gündə bu qədər şəhid verilməsi orduya inamız azaldır. Bu inamın azalması isə əsgərlərin deyil, məhz “zər poqonlu” generalların günahıdır.
Onu da qeyd edək ki, bu faciə 1994-cü ildən bəri bu qədər itki verdiyimiz ilk hadisədir. Düşünürük ki, Müdafiə Nazirliyi ona ünvanlanan bütün sualları cavablandıracaq. Bir faktı da xüsisi olaraq qeyd edək ki, sullar Azərbaycan dilində verilib.
Allah şəhidlərimizi rəhmət etsin!
Qaynar.info
Son şərhlər