Dünən tanınmış jurnalist, Binəqədi Bələdiyyəsinin sədri Niyaz Niftiyev və onunla bərabər ittiham irəli sürülmüş bələdiyyənin keçmiş sədri Mətanət Nəsibova, həmçinin keçmiş şöbə müdiri Sahib Abışovun məhkəmə prosesi keçirilib.
Elchi.az Bakupost.az-a istinadən xəbər verir ki, məhkəmə prosesində Mətanət Nəsibovanın ifadəsi dinlənilib.
M.Nəsibova bildirib ki, o, 2020-ci ilin yanvarından aprel ayına kimi Binəqədi qəsəbə Bələdiyyəsinin sədri vəzifəsini icra edib, həmin müddət ərzində Niyaz Niftiyev onun müavini, Sahib Abışov isə vergilər şöbəsinin müdiri olub.
O qeyd edib ki, pandemiya dövründə bələdiyyə ərazisində fəaliyyət göstərən sahibkarlar arayış almaq üçün bələdiyyəyə müraciət ediblər və müvafiq şöbə tərəfindən araşdırıldıqdan sonra həmin sahibkarlara arayışlar təqdim olunub:
“Arayışlar verilməzdən əvvəl onların torpaq və başqa vergilərin ödənilməsi tələb olunub. Əgər həmin sahibkarın hər-hansı bir borcu varsa, əvvəlcə o ödənilirdi. Ödənişlə bağlı qəbz alınırdı və həmin qəbz hazırlanan arayışın arxasına tikilib, mənə təqdim olunurdu. Mən baxıb, imzalayıb, möhürləyirdim”.
Məlumat üçün bildirək ki, ittiham olunan şəxslər pandemiya vaxtında ayrı-ayrı şəxslərə saxta arayışlar verməkdə ittiham olunurlar.
Məhkəmədə M.Nəsibovaya hakim və vəkillər tərəfindən suallar ünvanlanıb.
Əsas diqqət çəkən məqamlardan biri o olub ki, cinayət əməli kimi təqdim olunan arayışlarla bağlı sualı M.Nəsibova, “İllər ərzində daim o tipli arayışlar açıq şəkildə verilib”, – deyə cavablandırıb. Yəni vətəndaşın, sahibkarın fəaliyyətini təsdiq edən arayışlar daim olub.
Sahibkarların müraciəti əsasında pandemiya dövründə də həmin adamlara arayış təqdim olunub ki, onlar sərbəst şəkildə fəaliyyətlərini davam etdirə bilsinlər.
Keçmiş sədr onun əvəzinə Niyaz Niftiyevin və ya başqa səlahiyyətli şəxslərin imza atması ilə bağlı hansısa informasiyasının olub-olmaması ilə bağlı suala “yox” cavabını verib.
Bildirib ki, o, bələdiyyədə olmadığı müddətdə onun əvəzindən kiminsə arayışlara imza çəkməsi ilə bağlı onda heç bir məlumat olmayıb.
M.Nəsibova əlavə edib ki, onun rüşvət maddəsi ilə ittiham olunması absurddur:
“Bələdiyyə sədri ümumiyyətlə, vətəndaşın üzünü görmür. Onlardan vergi, pul müvafiq şöbədə alınır və işi sadəcə təqdim olunan arayışa imza atmaqdır”.
“Arayış verilən şəxsin doğurdan da həmin ərazidə fəaliyyət göstərib-göstərməməsinin necə müəyyənləşdirirsiniz” sualına isə belə cavab verib:
“Bildiyiniz kimi, Binəqədi ərazisində sakinlərin çoxunun rəsmi qeydiyyatı yoxdur. Ona görə də şəxsin orada yaşayıb-yaşamamasının şəxsiyyət vəsiqəsi ilə təsdiq edilməsi mümkün deyil. Bizim vergi müfəttişlərimiz hamını tanıyır. Bundan başqa, arayış istəyən şəxsi müvafiq şöbə araşdırır və Bizə bildirilir ki, doğurdan da həmin adam qəsəbə ərazisində fəaliyyət göstərir. Biz də bu təqdimat əsasında həmin arayışa imza atırdıq”.
Niyaz Niftiyev ilə bağlı suala M.Nəsibova çox müsbət cavab verib. Onun rüşvət alması, qanunsuz əməllər etməsi ilə bağlı heç bir məlumatının olmadığını bildirib.
Suallar veriləndən sonra hakim bildirib ki, artıq vaxt yoxdur, növbəti proseslər var və yenidən məhkəmə təxirə salınıb.
Buna etiraz edilib. Xahiş olunub ki, tez bir zamanda işə baxılsın. Heç olmasa Niyaz Niftiyev dindirilsin, onun ifadəsi eşidilsin və növbəti proseslər davam etdirilsin.
Hakim isə hazırda vaxtının olmadığını bildirib. Daha sonra həm Niyaz Niftiyevin, həm də qarşı tərəfin vəkili hakimdən heç olmasa 1 il 2 aydan çoxdur ki, həbsdə saxlanılan şəxsin ev dustaqlığına buraxılmağını xahiş ediblər.
Hakim deyib ki, Niyaz Niftiyevin ev dustaqlığına buraxılması məsələsi də növbəti məhkəmə proseslərində müzakirə oluna bilər.
Beləliklə, məhkəmə təxirə salınıb və 14 iyun tarixinə təyin edilib.
Qeyd edək ki, N. Niftiyevə qarşı Cinayət Məcəlləsinin 320.1-ci (Rəsmi sənədləri, dövlət təltiflərini, möhürləri, ştampları, blankları saxtalaşdırma, qanunsuz hazırlama, satma və ya saxta sənədlərdən istifadə etmə) və 139-1.1-ci (epidemiya əleyhinə və karantin rejimlərinin pozulması) maddələri ilə ittiham irəli sürülüb.
Sonradan bu maddələr dəyişdirilib, prokurorluqda ona Azərbaycan Respublikası CM-nin 309.1, 311.3.1, 311.3.2 və 313-cü maddələri ilə ittiham irəli sürülüb.
Son şərhlər