İsrailin Qəzzaya hücumlarının 32-ci günüdür. Baş nazir Benyamin Netanyahu bir daha atəşkəs çağırışlarını rədd edərək, “Girovlar azad edilmədən atəşkəs olmayacaq” deyib. Netanyahu İsrail ordusunun Qəzzanı yenidən işğal edəcəyi ilə bağlı mesajlar verib. Müdafiə naziri Yoav Qalant da quru qoşunlarının yeni planlarını təsdiqləyib. İsrail ordusu gecə boyu Qəzzada dinc sakinləri bombalamağa davam edib.
Elchi.az bu barədə Anadolu Agentliyinə istinadən xəbər verir.
İsrailin Qəzza zolağına hücumları ikinci ayına qədəm qoyub. Oktyabrın 7-dən bu yana həyata keçirilən hücumlarda 10 mindən çox fələstinli həyatını itirib.
İsrailin baş naziri Benyamin Netanyahu bir daha “Həmas girovları azad etmədikcə atəşkəs olmayacaq” deyib.
ABC kanalına danışan Netanyahu müharibə bitdikdən sonra Qəzzanı kimin idarə edəcəyi sualına cavab verib. İsrailin baş naziri belə cavab verib: “Düşünürəm ki, İsrail qeyri-müəyyən müddətə Qəzzada ümumi təhlükəsizlik məsuliyyətini öz üzərinə götürəcək, çünki təhlükəsizliyimiz olmayanda nə baş verdiyini görmüşük”.
İsrail 1967-ci ildə Qəzza sektorunu işğal edib. İsrail ordusu 2005-ci ilə qədər Qəzzaya nəzarət edirdi. Təl-Əviv rəhbərliyi 2005-ci ildə Qəzzadan çəkilməyə qərar verib.
ABŞ prezidenti Co Bayden də Netanyahu ilə telefon danışığı aparıb.
Ağ Evdən görüşlə bağlı verilən açıqlamada ABŞ administrasiyasının “ümumi atəşkəsin hazırkı mərhələdə uyğun olmadığı” fikrini saxladığı bildirilib.
Nuranə Məmmədova
